Planet për një Lamborghini plotësisht elektrik janë shtyrë në një të ardhme të pacaktuar. Sipas një raporti nga The Sunday Times, kompania ka vendosur të mos nisë prodhimin e konceptit elektrik Lanzador, i cili ishte parashikuar të dilte në treg rreth vitit 2029.
CEO dhe kryetari i Lamborghini-t, Stephen Winkelmann, ka deklaruar se interesi i klientëve për automjete plotësisht elektrike është “pothuajse zero”. Vendimi për anulimin e Lanzador-it është marrë në fund të vitit të kaluar, por kjo është hera e parë që konfirmohet publikisht, pas prezantimit madhor të konceptit në gusht 2023. Sipas Winkelmann, automjetet elektrike, në formën e tyre aktuale, nuk arrijnë të ofrojnë lidhjen emocionale që presin klientët e markës. Një faktor kyç duket të jetë mungesa e zhurmës karakteristike të motorëve me djegie të brendshme, e cila për shumë adhurues të Lamborghini-t është pjesë thelbësore e përvojës.
Në vend të Lanzador-it, kompania do të fokusohet te modelet plug-in hibride, duke ndjekur shembullin e Revuelto dhe Urus. Me këtë strategji, deri në vitin 2030, e gjithë gama e Lamborghini-t pritet të përbëhet nga automjete hibride. Winkelmann theksoi gjithashtu se kompania do të vazhdojë prodhimin e motorëve me djegie të brendshme “për aq kohë sa të jetë e mundur”.
Megjithatë, dera për një Lamborghini plotësisht elektrik nuk është mbyllur përfundimisht. CEO la të kuptohet se një model i tillë mund të realizohet në të ardhmen, por vetëm “kur të vijë momenti i duhur”, pra kur teknologjia dhe pritshmëritë e klientëve të përputhen më mirë me ADN-në emocionale të markës.
