Një studim i ri shkencor ka zbuluar se loja Tetris mund të pengojë kujtimit të momenteve traumatike, me efekte që zgjasin deri në 6 muaj pas trajtimit. Duke e mbajtur trurin të angazhuar vizualisht, këto kujtime të padëshiruara kanë më pak mundësi të shfaqen, duke lehtësuar simptomat e traumës psikologjike.
Studimi u publikua në The Lancet Psychiatry dhe u përqendrua në trajtimin e kujtimeve të gjalla, të pavullnetshme dhe të padëshiruara, të cilat janë një simptomë kryesore e çrregullimit të stresit post-traumatik (PTSD). Trajtimi, i quajtur Imagery Competing Task Intervention (ICTI), u zhvillua nga Uppsala University në bashkëpunim me P1vital dhe u testua së bashku me University of Cambridge dhe University of Oxford.
Trauma psikologjike, si përjetimi i dhunës, mund të shkaktojë strese që zgjasin për vite dhe ndikojnë ndjeshëm në shëndetin mendor dhe fizik. Sipas udhëheqëses së studimit, profesoreshës Emily Holmes, edhe një kujtim i vetëm traumatik mund të rrëmbejë vëmendjen dhe të shkaktojë emocione të forta të padëshiruara.
Studimi u fokusua te punonjësit e shëndetësisë që kishin përjetuar trauma gjatë pandemisë COVID-19. Pjesëmarrësit u ndanë në tre grupe: njëri përdori ICTI, tjetri dëgjoi muzikë klasike dhe i treti mori trajtimin standard. Rezultatet treguan se ICTI uli kujtimet traumatike nga mesatarisht 14 në javë në vetëm 1 në javë pas katër javësh trajtim, rreth 10 herë më pak se grupet e tjera. Pas gjashtë muajsh, 70% e pjesëmarrësve në grupin ICTI ishin plotësisht pa kujtime traumatike.
Metoda funksionon duke aktivizuar zonat vizuale të trurit përmes lojës Tetris, duke konkurruar drejtpërdrejt me imazhet traumatike. Përveç uljes së “flashback”, studimi gjeti përmirësime edhe në ankth, depresion dhe funksionimin e përgjithshëm, duke e bërë këtë një trajtim premtues, të thjeshtë dhe praktik për PTSD.
