Filmat hapësinorë si Interstellar mund të duken shumë bukur në një botë imagjinare kinematografike por realiteti ama është shekuj larg, madje krejt primitiv, për këtë do të bindesh pasi të dëgjosh të rejat e NASA.
Së fundmi organizata ka publikuar një plan për të plotësuar një detyrë të cilës prej vite njerëzimi i vjen rrotull; marrjen e provëzave nga planeti Mars.
Po një detyrë në dukje kaq e thjeshtë në realitet kërkon vite planifikim.
Pjesa e parë ka të bëjë me roverin Mars Preserverance i cili pavarsisht pandemisë do të lançohet në Korrik. Preserverance do të marrë kampione nga sipërfaqja e Marsit, gjithsej 30 tuba të vegjël dhe do ti ruajë në bord.
Pjesa e dytë është çmenduria vetë.
Një anije e dytë do të shkojë në Mars duke u nisur në 2026 dhe duke mbërritur në 2028, e do të ulet afër Preserverance në kraterin Jezero.
Do të lëshojë një rover të dytë që do të shkojë të marrë provëzat dhe do ti depozitojë ato në “mjetin ngritës nga Marsi” i cili kish ardhur bashkë me të. Kjo raketë e vogël do të lançohet në orbitë, si raketa e parë që ngrihet nga Marsi.
Më pas një anije e tretë në pritje, do të sinkronizohet me raketën e provëzave, do ta marrë dhe do ta sjellë në tokë, me shpresë brenda vitit 2031.
Në fakt është e pamundur të mendosh një mënyrë tjetër duke llogaritur vështirësitë e udhëtimit në Mars. Preserverance nuk i bën dot të gjitha detyrat, ndaj mbledhja, ngritja dhe rizbritja është një proçes që kërkon edhe dy mjete të tjera të cilat sigurisht akoma nuk janë projektuar.
Do të duhet pra edhe të paktën një dekadë përpara se të kemi disa provëza bazë të terrenit të një planeti tjetër. Ndaj nëse nën justifikimin se do ta gjejmë një planet tjetër, neglizhojmë mirëqënien e planetit Tokë gabohemi rëndë. Edhe për disa shekuj të tjerë do të jemi këtu, ndaj bëjmë mirë të kujdesemi përpara se të jetë vonë.
