AI.com është shndërruar në domianin që është shitur për shifrën më të lartë në histori, pasi u ble për $70 milionë nga Kris Marszalek, themelues dhe CEO i Crypto.com. Transaksioni u krye tërësisht me kriptomonedha dhe thyen rekordin e mëparshëm prej $49.7 milionë për CarInsurance.com. Domaini kushtoi dyfishin e VacationRentals.com (35 milionë) dhe shumë më tepër se Voice.com, PrivateJet.com apo Sex.com, të cilët janë shitur për shuma më të ulëta.
Marszalek e bleu AI.com pak para Super Bowl, me synimin që faqja të promovohej përmes një reklame gjatë ndeshjes. Megjithatë, menjëherë pas transmetimit të reklamës, përdoruesit vunë re se faqja ishte jashtë funksionit, gjë që tërhoqi vëmendje dhe kritika. Pavarësisht kësaj, blerësi beson se çmimi ishte i arsyeshëm, duke argumentuar se domain-e të tilla unike nuk kanë zëvendësim dhe mundësi të ngjashme shfaqen shumë rrallë.
Sipas ndërmjetësit të shitjes, Larry Fischer, emra si AI.com janë asete të pazëvendësueshme dhe vlera e tyre rritet me intensifikimin e konkurrencës në fushën e inteligjencës artificiale. Blerja tregon se betejat për identitet dhe markë në sektorin e AI janë po aq të rëndësishme sa vetë teknologjia.
Faqja AI.com ofron agjentë personalë të inteligjencës artificiale, falas dhe me abonim, për detyra si dërgimi i mesazheve, përdorimi i aplikacioneve, tregtimi i aksioneve dhe krijimi i profileve për njohje. Agjentët veprojnë në emër të përdoruesit, duke organizuar punë dhe projekte, me fokus në privatësi dhe leje të qarta. Nuk dihet ende nëse platforma përdor modele të veta apo të licencuara.
Marszalek shprehet i bindur se AI nuk është një flluskë kalimtare, por një nga valët më të mëdha teknologjike të dekadave të ardhshme. Megjithatë, historia tregon se një domain i mirë nuk garanton sukses, siç dëshmon rasti i Lambo.com, ku blerësi humbi si paratë ashtu edhe betejën ligjore.
