Drejtori ekzekutiv i Take-Two Interactive, Strauss Zelnick, ka shkaktuar shqetësim mes fansave pas deklaratës se kompania po “përqafon aktivisht inteligjencën artificiale gjenerative”. Megjithatë, për të zbutur reagimet negative, ai theksoi qartë se kjo teknologji nuk do të ketë “asnjë rol” në zhvillimin e GTA 6, një nga titujt më të shumëpritur në industrinë e videolojërave.
Zelnick iu përgjigj një pyetjeje rreth Project Genie, një mjet eksperimental i Google i prezantuar së fundmi, i cili është në gjendje të shndërrojë udhëzime të thjeshta tekstuale në ambiente video të shkurtra dhe të eksplorueshme, pra në botë interaktive. Ky njoftim i Google duket se ndikoi drejtpërdrejt te investitorët, pasi aksionet e Take-Two ranë në nivelin më të ulët të 11 muajve. Një reagim që Zelnick e cilësoi si të pakuptueshëm.
Sipas tij, industria e videolojërave ka qenë e ndërtuar mbi inteligjencën artificiale dhe mësimin makinerik që nga fillimet e saj. “Ne i krijojmë lojërat tona në kompjuterë duke përdorur teknologji, dhe që prej momentit kur filluan debatet për AI gjenerative, unë kam qenë jashtëzakonisht entuziast për atë që mund të sjellë e ardhmja,” u shpreh ai.
Zelnick bëri të ditur se Take-Two po teston aktualisht përdorimin e AI gjenerative përmes qindra projekteve pilot brenda kompanisë, përfshirë edhe në studiot e saj. Edhe pse ai e sheh këtë teknologji si një mjet premtues për të ardhmen, deklarata e tij nënvizon se për momentin, të paktën për GTA 6, zhvillimi do të mbetet i bazuar në metodat tradicionale dhe krijimtarinë njerëzore.
