Pajisjet e realitet virtual zakonisht janë të mëdha dhe bien shumë në sy, gjë që i bën pak praktike për përdorim të përditshëm ose në ambiente publike. Për ta bërë këtë përvojë më të thjeshtë, një kompani koreano-jugore e quajtur Geeks Loft ka prezantuar Perisphere, një pajisje që kombinon kufjet me një ekran kompakt të integruar, të fshehur në shiritin e kokës.
Perisphere nuk është një headset AR apo VR klasik. Ai përfshin dy ekrane 1080p që pozicionohen përpara syve dhe ofrojnë ndriçim deri në 1.800 nits dhe një fushë shikimi prej 53 gradësh. Kjo krijon ndjesinë e shikimit të përmbajtjes në një ekran shumë më të madh, ideal për video dhe aplikacione 2D dhe 3D. Moduli i ekranit fshihet brenda kufjeve kur nuk përdoret dhe nxirret poshtë vetëm kur nevojitet.
Pajisja është e pajisur edhe me dy sete kamerash 5MP: një pranë syve për regjistrim 3D dhe një tjetër në pjesën e poshtme të headset-it për filmim përpara, edhe kur ekrani është i palosur. Kjo e bën Perisphere interesante për krijuesit e përmbajtjeve.
Bateria e integruar 2.500 mAh ofron deri në tre orë shikim video dhe mbështet karikim të shpejtë. Nga ana audio, kufjet ofrojnë Spatial Audio dhe anulim aktiv të zhurmës, duke synuar një përvojë tërësisht zhytëse.
Edhe pse Geeks Loft nuk ka dhënë ende detaje për çmimin, përmbajtjen 3D apo mbështetjen për lojëra, forma kompakte dhe koncepti i “ekranit të madh portativ” e bëjnë Perisphere një alternativë interesante për udhëtime ose përdorim në shtëpi. Pajisja është demonstruar në prototip që nga viti 2024 dhe pritet të shfaqet në CES, me synimin për prodhim masiv dhe lançim në vitin 2026.
