Studiuesit australianë kanë zbuluar një mënyrë të re dhe të qëndrueshme për të ripërdorur mbetjet e kafes, duke i kthyer ato në një përbërës për beton më të fortë dhe më miqësor me mjedisin. Ekipi nga Royal Melbourne Institute of Technology (RMIT), i udhëhequr nga Jingxuan Zhang dhe Mohammad Saberian, ka treguar se mbetjet e kafes të konvertuara në beton mund të zvogëlojnë gjurmën e karbonit të betonit deri në 26%.
Australia prodhon rreth 83,000 ton mbetje kafeje çdo vit, të cilat zakonisht përfundojnë në landfille. Në vend që të hidhen, studiuesit e ngrohën këtë material në rreth 350°C, në mungesë oksigjeni, përmes procesit të pirolizës, duke e shndërruar në një substancë të pasur me karbon të përdorur zakonisht në bujqësi për të përmirësuar tokën dhe për të ruajtur karbonin. Tani, shkencëtarët zbuluan se këto mbetje mund të zëvendësojnë një pjesë të rërës në prodhimin e betonit, duke krijuar një alternativë më të qëndrueshme.
Eksperimentet fillestare treguan se zëvendësimi i 15% të rërës me mbetjet e përpunuara të kafesë rriti forcën e betonit me rreth 30%. Analiza e ciklit të jetës së materialit tregoi gjithashtu ulje të emetimeve të CO2 me 15%, 23% dhe deri në 26% kur 5%, 10% dhe 15% e rërës u zëvendësuan me bioqymyr. Studimi evidentoi gjithashtu një reduktim deri në 31% të përdorimit të lëndëve djegëse fosile, si dhe përmirësime të dukshme në ndikimin mbi ekosistemet ujore.
Betoni i përforcuar me mbetje kafesh të përpunuara ndihmon në mbylljen e karbonit në strukturën betoni dhe kontribuon në objektivat kombëtare për ekonomi qarkore dhe neutralitet karbonik. Ekipi i RMIT është duke bashkëpunuar me industri dhe autoritete për të nisur projekte pilot dhe për të integruar teknologjinë në standardet e ndërtimit.
