Çdo tre muaj, platforma e parashikimeve Metaculus organizon një “kapionat parashikimi” me çmim rreth $5,000, ku pjesëmarrësit përpiqen të parashikojnë ngjarje gjeopolitike si grusht shteti në Tajlandë apo sulmet izraelite ndaj Iranit. Në vend të përgjigjeve “po” ose “jo”, ata japin probabilitete, duke u treguar shpesh mjaft të saktë. Parashikuesit e Metaculus, për shembull, parashikuan me sukses datën e pushtimit rus të Ukrainës dhe rrëzimin e vendimit Roe v. Wade.
Në kupën e verës, surpriza erdhi nga një inteligjencë artificiale. Startup-i britanik Mantic, me një AI të trajnuar posaçërisht për parashikime, u rendit në vendin e 8 nga 549 konkurrentë, duke arritur mbi 80% të rezultatit të mesatares më të mirë njerëzore, edhe pse fillimisht mendohej se do të arrinte vetëm 40%. Kjo ishte hera e parë që një bot hynte në top-10 të garës.
Parashikimet janë thelbësore për qeveri e institucione si RAND, sepse ndihmojnë jo vetëm të parashikojnë, por edhe të ndryshojnë të ardhmen, duke orientuar vendimmarrësit. Por parashikimet njerëzore për çështje komplekse kërkojnë ditë pune dhe shpenzime të mëdha. Aty hyn AI, e aftë të përpunojë të njëjtat të dhëna të çrregullta si njerëzit, të mësojë nga rezultatet dhe të përditësojë vazhdimisht vlerësimet.
Avantazhi i makinave është ritmi: ato mund të japin dhe rifreskojnë parashikime për qindra pyetje njëherësh, diçka e pamundur për njerëzit. Në këtë garë, Mantic e mundi shumicën e pjesëmarrësve, por mbeti pesë vende pas “Community Prediction”, mesatares kolektive të të gjithë përdoruesve, e cila shpesh është ndër më të saktat.
Ekspertët theksojnë se edhe parashikuesit më të mirë—qoftë AI apo njerëz—janë thjesht mbështetje për vendimmarrjen. Në fund, udhëheqësit politikë mund të ndjekin instinktet e tyre, por AI po tregon se mund të ofrojë shpejtësi dhe mbulim të gjerë, duke kursyer kohë dhe burime dhe duke lënë njerëzit të fokusohen te çështjet më kritike.
