Bletët janë thelbësore për furnizimin e bollshëm të ushqimit gjatë gjithë vitit, pasi mbi një të tretën e kulturave ushqimore varen nga pjalmimi i tyre. Por popullata e bletëve po përballet me rënie alarmante: rreth 40% e kolonive shkatërrohen çdo vit, sipas kompanisë kaliforniane Beewise. Shkaktarët kryesorë janë ndryshimet klimatike – uragane më të forta, zjarre më të shpeshta – dhe përdorimi i pesticideve.
Tradicionalisht, bletaria komerciale mbështetet te kosheret prej druri, të shpikura rreth vitit 1850, por ato nuk ofrojnë mbrojtje të mjaftueshme dhe nuk janë “mikpritëse” për bletët. Për ta ndryshuar këtë realitet, startup-i Beewise ka krijuar BeeHome, një koshere robotike e fuqizuar nga inteligjenca artificiale që fermerët mund ta marrin me qira.
BeeHome është e pajisur me kamera dhe softuer AI që monitorojnë çdo bletë individualisht, duke përcaktuar nevojat e saj. Sistemi robotik mund të furnizojë ushqim, të japë ilaçe dhe të rregullojë temperaturën në mënyrë automatike, duke mbrojtur bletët nga kushtet e jashtme, si stuhitë apo i ftohti. Kjo teknologji është provuar shpëtimtare, sidomos pas uraganeve Helene dhe Milton, që vitin e kaluar shkatërruan mijëra koshere në Florida, Xhorxhia dhe Karolinën e Veriut.
Një BeeHome menaxhon deri në 10 koshere, me kosto të ngjashme me koshere tradicionale, por me kursim të madh në punë. Modelet e ardhshme mund të kontrollojnë deri në 40 ose më shumë koshere, duke rritur ndjeshëm fitimet për fermerët dhe duke tërhequr investitorë. Sipas CEO Saar Safra, kjo zgjidhje ul humbjet e kolonive me rreth 70% dhe siguron shëndet më të mirë për bletët.
Beewise ka tashmë mijëra BeeHome në terren dhe raporton rritje të madhe të të ardhurave, pajisjeve dhe klientëve, me marzhe bruto 40%. Kompania ka siguruar 170 milionë dollarë financim nga investitorë si Corner Ventures, Insight Partners, Fortissimo, Lool Ventures dhe APG, duke e vendosur si një lojtar kryesor në shpëtimin e bletëve dhe rritjen e qëndrueshme të prodhimit bujqësor.
