Italia është bërë vendi i parë në Bashkimin Europian që miraton ligje për rregullimin e përdorimit të inteligjencës artificiale, duke vendosur edhe dënime me burg për përdorimin abuziv të teknologjisë. Qeveria e djathtë e kryeministres Giorgia Meloni e konsideron këtë ligj si një hap vendimtar për të udhëhequr përdorimin e AI në vend, në përputhje me Aktin Evropian të AI-së. Synimi është nxitja e një përdorimi “të përqendruar te njeriu, transparent dhe të sigurt”, duke ruajtur inovacionin, privatësinë dhe sigurinë kibernetike.
Ligji parashikon burg nga 1 deri në 5 vjet për shpërndarjen e paligjshme të përmbajtjeve të gjeneruara ose manipuluara nga AI nëse ato shkaktojnë dëme, me dënime më të rënda kur teknologjia përdoret për krime si mashtrimi apo vjedhja e identitetit. Po ashtu, vendosen rregulla të rrepta transparence dhe mbikëqyrjeje njerëzore për përdorimin e AI-së në fusha si shëndetësia, arsimi, drejtësia dhe sporti. Fëmijët nën 14 vjeç do të kenë nevojë për pëlqimin prindëror për të aksesuar shërbime të AI-së.
Në fushën e të drejtave të autorit, vepra të krijuara me ndihmën e AI-së mbrohen vetëm nëse kanë kontribut intelektual real, ndërsa “text and data mining” lejohet vetëm për përmbajtje pa të drejtë autori ose për kërkime shkencore nga institucione të autorizuara. Zbatimi i ligjit do të mbikëqyret nga Agjencia për Digjitalizimin e Italisë dhe Agjencia Kombëtare e Sigurisë Kibernetike.
Meloni e ka quajtur inteligjencën artificiale “revolucionin më të madh të kohës sonë”, por ka theksuar se zhvillimi i saj duhet të bëhet brenda një kornize etike që vë në qendër të drejtat dhe nevojat e njeriut. Ligji përfshin edhe deri në 1 miliard euro fonde shtetërore për të mbështetur kompanitë në fushat e AI-së, sigurisë kibernetike dhe telekomunikacionit, ndonëse kritikët e shohin këtë shumë të vogël krahasuar me investimet e SHBA-së dhe Kinës.
