Apple ka prezantuar AirPods Pro 3, përditësimin më të madh të produktit pas tre vitesh. Kufjet sjellin disa risi të rëndësishme, duke përfshirë një sensor të ri të rrahjeve të zemrës, anulim aktiv të zhurmës (ANC) të përmirësuar dhe një funksion përkthimi në kohë reale. Çmimi i tyre është $249, me porositë që hapen sot dhe dërgesat që nisin më 19 shtator.
ANC i gjeneratës së re konsiderohet si “më i miri në botë” për kufje in-ear, falë majave të reja me shkumë që ofrojnë izolim më të madh të zhurmës. Apple pretendon se anulimi i zhurmës është dyfish më i fuqishëm se në modelin e mëparshëm, duke sjellë një përvojë dëgjimi më të pastër dhe më zhytëse.
Risia më e madhe është sensori i rrahjeve të zemrës, i cili përdor teknologjinë PPG për të matur qarkullimin e gjakut përmes dritës infra të kuqe. Ai punon së bashku me sensorët dhe GPS-in për të gjurmuar aktivitetin, kaloritë e djegura dhe historikun e fitnesit. Kjo funksionon me aplikacionin Fitness në iPhone, duke aktivizuar përvojën e re Workout Buddy, të fuqizuar nga Apple Intelligence.
Funksioni i ri Live Translation lejon përdoruesit të komunikojnë me persona në gjuhë të ndryshme. ANC ul zërin e folësit, ndërsa përkthimi dëgjohet drejtpërdrejt në kufje. Për bisedat me persona që nuk përdorin AirPods, iPhone mund të shfaqë transkriptimin në kohë reale në ekran.
Apple ka ridizajnuar gjithashtu formën e AirPods Pro 3 pas analizimit të mbi 10,000 skanimeve 3D të veshëve, duke i bërë ato më të vogla dhe me pesë madhësi majash plastike. Pajisja ka rezistencë IP57 ndaj ujit dhe djersës.
Me iOS 26, edhe AirPods të tjera do të përfitojnë veçori të reja, si përdorimi si telekomandë për kamerën, audio me cilësi studioje dhe përmirësime në thirrje e karikim.
