Një avokat nga Indiana, që rastësisht quhet Mark Zuckerberg, ka paditur kompaninë Meta pasi platforma Facebook i ka mbyllur në mënyrë të përsëritur profilet personale dhe të biznesit, duke e akuzuar gabimisht për imitim të themeluesit miliarder me të njëjtin emër.
Zuckerberg, një avokat në Indianapolis, thotë se ka përballuar probleme identiteti në Facebook për 15 vjet. Profili i tij personal i verifikuar është bllokuar pesë herë, ndërsa në maj humbi 11 mijë dollarë nga fondet e reklamave pasi faqja e firmës së tij u çaktivizua për të katërtën herë. Kjo e shtyu të ngrejë padi, duke akuzuar Meta-n për neglizhencë dhe shkelje kontrate.
Ai rrëfen se hera e parë që iu mbyll llogaria ishte në vitin 2010, dhe që atëherë ka kaluar nëpër procese të gjata apelimi, ku është dashur të dërgojë foto, dokumente identiteti e madje edhe kartat e kreditit për të provuar se është person real. “Është ofenduese që një kompani kaq teknologjike nuk arrin të kuptojë se llogaria është e imja,” tha avokati me 38 vite përvojë.
Meta, pasi u pyet nga The Post, pranoi se kishte marrë ankesën dhe konfirmoi se llogaria ishte çaktivizuar gabimisht. Një zëdhënës tha se kompania e kishte riaktivizuar profilin e avokatit dhe po punon për të parandaluar përsëritjen e rastit.
Ndërkohë, jeta e Zuckerberg-ut avokat është shpesh e komplikuar nga emri i tij. Firma e tij merr telefonata të përditshme nga përdorues që kërkojnë ndihmë për llogaritë e tyre, pranon pako të adresuara gabimisht për miliarderin dhe madje në 2020 u padit gabimisht nga një agjenci shtetërore. Për t’i dokumentuar këto raste, ai ka krijuar një faqe interneti.
Avokati kërkon që Meta të rimbursojë fondet e humbura, të paguajë shpenzimet ligjore dhe të ndalojë bllokimet e ardhshme. Me shaka shton se dëshiron që Mark Zuckerberg i Meta-s t’i vijë personalisht, t’i japë çekun dhe t’i kërkojë falje – gjë që ai e quan “e pamundur”.
