Një studim i ri nga King’s College London tregon se panelet diellore në hapësirë mund të ulin deri në 80% nevojën e Evropës për energji të rinovueshme tokësore deri në vitin 2050. Duke përdorur një model kompjuterik të rrjetit energjetik të 33 vendeve evropiane, studiuesit zbuluan se teknologjia e bazuar në dizajnin e NASA-s jo vetëm që do të siguronte furnizim të qëndrueshëm me energji, por gjithashtu do të ulte koston e sistemit energjetik evropian deri në 15% dhe do të reduktonte përdorimin e baterive me mbi dy të tretat.
Panelet diellore në hapësirë përdorin pasqyra reflektuese për të mbledhur dritën e diellit në orbitë dhe më pas e transmeton atë drejt stacioneve tokësore, ku shndërrohet në energji elektrike për rrjetin. Për dallim nga burimet tokësore, të cilat varen nga kushtet e motit dhe kanë variabilitet të lartë, panelet hapësinore ofrojnë furnizim të vazhdueshëm në shkallë gjigante.
Megjithatë, studimi thekson edhe sfida të mëdha. Këto përfshijnë rreziqet e kongjestionit orbital, ndërprerjet e transmetimit, dëmtimet nga mbeturinat hapësinore dhe koston shumë të lartë të ndërtimit dhe mirëmbajtjes së paneleve. Vetëm përmes përparimeve teknologjike dhe uljes së shpenzimeve, përdorimi i këtyre paneleve mund të bëhet ekonomikisht i qëndrueshëm deri në mesin e shekullit.
Pavarësisht rreziqeve, autorët e artikullit të botuar në Joule besojnë se kjo teknologji mund të ndihmojë ndjeshëm Evropën në arritjen e objektivit të neto-zero. Dr. Wei He, autor kryesor i studimit, theksoi se energjia diellore hapësinore mund të bëhet një burim qendror, duke ulur varësinë nga gazi dhe duke ofruar furnizim të qëndrueshëm.
Japonia tashmë po e zhvillon këtë teknologji si pjesë të strategjisë së saj energjetike. Studiuesit sugjerojnë që edhe Evropa, falë traditës së saj të bashkëpunimit ndërkombëtar në energji dhe satelitë përmes ESA-s, mund të ndërtojë një infrastrukturë të përbashkët për të garantuar siguri energjetike afatgjatë.
