Kompania gjermane Volkswgen ka prezantuar një model të ri abonimi për klientët në Mbretërinë e Bashkuar që duan të shtojnë fuqinë e disa makinave elektrike nga gama ID.3. Pronari i një modeli të përshtatshëm mund të paguajë ekstra për të “çliruar” potencialin e plotë të motorit. Çmimi varion nga £16.50 në muaj, £165 në vit, deri tek një pagesë e vetme prej £649 për një abonim të përhershëm, i cili mbetet i lidhur me makinën edhe nëse ajo shitet.
VW thotë se ky opsion u jep konsumatorëve “zgjedhje” dhe e sheh si një vazhdim të praktikave të vjetra, ku motorët me madhësi të ngjashme ofroheshin me nivele të ndryshme fuqie. Sipas kompanisë, avantazhi i kësaj skeme është se shoferët mund të zgjedhin një përvojë më sportive në çdo kohë, pa qenë të detyruar të paguajnë një çmim më të lartë që në blerje.
Megjithatë, kjo teknikë ka ngjallur debate. Kritikët vënë në dukje se konsumatorët tashmë po posedojnë një makinë me teknologjinë e integruar, por për të shfrytëzuar funksionalitetin e plotë duhet të paguajnë shtesë. Përvoja të ngjashme janë parë edhe tek prodhues të tjerë si BMW, që ofroi abonime për ngrohjen e sediljeve dhe timonit, apo Mercedes, i cili në SHBA lejoi në vitin 2022 pagesa online për të rritur shpejtësinë e makinave elektrike.
Një raport i S&P Global tregon se klientët nuk po paguajnë për abonime në makina: nga 86% që paguanin në vitin 2024, në 2025 po paguajnë vetëm 68% e klientëve. Kjo vjen pavarësisht rritjes globale të ekonomisë së abonimeve, e cila sipas Juniper Research pritet të arrijë vlerën e gati 1 trilion dollarë deri në vitin 2028.
