Microsoft ka zbuluar një sistem të avancuar inteligjence artificiale që tejkalon aftësinë e mjekëve në diagnostikimin e rasteve të ndërlikuara mjekësore. I zhvilluar nën drejtimin e Mustafa Suleyman, ky sistem imiton një panel mjekësh ekspertë dhe përdor modelin e përparuar o3 të OpenAI për të analizuar raste sfiduese diagnostike.
Kur u testua me mbi 300 raste të ndërlikuara nga New England Journal of Medicine, AI arriti të zgjidhte saktë mbi 80% të tyre, ndërsa mjekët pa ndihmë arritën vetëm 20%. Sistemi funksionon si një mjek i vërtetë, duke ndjekur hapa si pyetjet dhe analizat e nevojshme, për të arritur në një diagnozë.
Ky sistem udhëhiqet nga një “orkestrues diagnostik“, që vepron si një ekip specialistësh për të vendosur analizat dhe diagnozën. Microsoft pretendon se ky model sjell një thellësi dhe gjerësi njohurish që tejkalon çdo mjek të vetëm, duke mundësuar vendimmarrje më të saktë në raste të ndërlikuara.
Megjithëse u theksua kursimi i kostove, Microsoft minimizoi ndikimin në vendet e punës, duke thënë se AI do të plotësojë rolin e mjekëve, jo ta zëvendësojë atë. Mjekët janë thelbësorë për ndërtimin e besimit dhe menaxhimin e paqartësive, gjë që AI nuk e bën dot.
Suleyman beson se teknologjia do të jetë pothuajse pa gabime brenda 5–10 viteve dhe do të lehtësojë sistemet shëndetësore në mbarë botën. Microsoft pranon se sistemi nuk është ende gati për përdorim klinik dhe kërkon testime të mëtejshme, veçanërisht për simptomat më të zakonshme.
