Familja Trump ka nisur një sipërmarrje të re biznesi në fushën e smartphone-ve nëpërmjet Trump Phone dhe rrjetit celular të quajtur T1 Mobile. Telefoni T1, me ngjyrë ari dhe me çmim $499, do të dalë në treg në gusht dhe ka të stampuar sloganin “Make America Great” dhe një flamur amerikan të gdhendur. Edhe pse i markuar si “Trump Mobile”, telefoni prodhohet dhe dizenjohet nga një kompani tjetër.
Në website nuk është listuar asnjë procesor, por me sa duket do të ketë 12GB RAM dhe 256GB hapësirë ruajtjeje të zgjerueshme, dhe do të funksionojë me Android 15. Ekrani 6.78 inç përdor një panel OLED 120Hz, dhe telefoni do të ketë një bateri 5,000mAh dhe madje edhe një portë kufjesh 3.5 mm. Nuk është një listë e keqe specifikimesh, megjithëse kamerat nuk duken mbresëlënëse: një kamerë kryesore 50 megapiksel e shoqëruar vetëm nga sensorë makro dhe thellësie 2 megapiksel. Nuk ka asnjë lente ultra të gjerë.
Plani mujor, i quajtur The 47 Plan (duke iu referuar presidencës së Trump si i 47-ti), kushton 47.45 dollarë dhe përfshin thirrje, mesazhe dhe internet të pakufizuar, asistencë rrugore dhe shërbim telemjekësor.
Eric Trump deklaroi se projekti pasqyron vlerat amerikane dhe ofron besueshmëri e përballueshmëri, duke theksuar se prodhimi dhe shërbimi mbështetës do të jenë të bazuara në SHBA. Kompania bashkëpunon me operatorë ekzistues dhe ofron rrjet 5G.
Ky është projekti më i fundit në një sërë sipërmarrjesh të familjes Trump, përfshirë marrëveshje në Katar dhe Vietnam. Edhe pse disa nisën para presidencës së Trump, shumë prej tyre ngrenë shqetësime etike, pasi ai ka përdorur ndikimin e tij politik për përfitim personal.
Megjithëse marka Trump ka pësuar rënie, sidomos pas sulmit të 6 janarit, disa prej nismave të tij të fundit, veçanërisht në mediat dhe kriptovalutat, kanë qenë të suksesshme. Trump Media po planifikon një ETF të ri që do të investojë 75% në Bitcoin dhe 25% në Ether. Raportet financiare tregojnë se vitin e kaluar Trump fitoi mbi $57 milionë nga një kompani kripto që themeloi me djemtë e tij.
Pavarësisht polemikave, familja Trump po mbështetet te besnikëria politike për suksesin në teknologji dhe telekomunikacion.
