Me mbi 650 milionë lojtarë të regjistruar, Fortnite është pa dyshim një nga videolojërat më të njohura në botë. Tani, ekspertët kanë paralajmëruar se disa fëmijë po kalojnë aq shumë kohë duke luajtur lojën sa që po zhvillojnë ‘thekse Fortnite’ të të folurit.
Theksi Fortnite është zakonisht me zë të lartë dhe me mimika të çuditshme, sipas ekspertëve në Preply. Gjithashtu shpesh përmban një theksim të fjalëve në fund të çdo fjalie, pothuajse sikur gjithçka të thuhet në tonin e një pyetjeje.
“Për shkak moshës së re të një numri të madh të gamers, ka filluar të imitohet shpesh tingulli i një zëri fëmijësh tepër të emocionuar ose të frustruar,” shpjegoi Preply. Nëse fëmija juaj ka zhvilluar një theks të tillë, ekspertët thonë se kjo mund të tregojë se ai nuk po shpenzon mjaftueshëm kohë për të krijuar lidhje në botën reale.
“Ndërsa lojërat mund të jenë argëtuese dhe madje të dobishme me moderim, është gjithashtu e rëndësishme që fëmijët të kalojnë kohë duke ndërvepruar personalisht me të tjerët”, shtoi Preply. “Këto lidhje të botës reale ndihmojnë në mbështetjen jo vetëm të zhvillimit të tyre gjuhësor, por edhe në rritjen e tyre sociale dhe emocionale.”
Preply shtoi se theksi nxitet nga natyra intensive, ndonjëherë kaotike e lojës, veçanërisht kur lojtarët vriten në botën virtuale. “Kur vdes në Fortnite, duhet të fillosh nga e para, duke humbur të gjithë plaçkën dhe përfitimet që ke krijuar. Kjo mund të çojë në shumë të bërtitura me zë të lartë dhe shprehje të ekzagjeruara të zhgënjimit.”
Ideja se një lojë është aq ndikuese sa mund të ndryshojë theksin e fëmijës suaj mund të duket mjaft e errët. Megjithatë, Preply pretendon se në fakt është një fenomen krejtësisht natyror. Fatmirësisht, theksi Fortnite nuk është i përhershëm – veçanërisht jo tek fëmijët dhe adoleshentët, zakonet e të folurit të të cilëve janë ende në zhvillim.
“Interesat dhe hobi i fëmijëve dhe adoleshentëve po evoluojnë vazhdimisht, dhe gjasat janë që ndërsa rriten, ata do ta gjejnë veten në mjedise të ndryshme sociale, jo vetëm në lojërat online“, shtoi Preply. Sapo të ndalojnë së luajturi lojën aq shpesh dhe të fillojnë të përzihen me njerëz dhe grupe të ndryshme moshatarësh, ata zakonisht do të kthehen në mënyrën e tyre origjinale të të folurit ose do të kalojnë në një stil tjetër krejtësisht.
