Lajmi se TikTok do të ndalojë së funksionuari së shpejti në Shqipëri po qarkullon prej kohësh, që nga ajo deklaratë e bërë pak javë më parë nga kryeministri i vendit, Edi Rama.
Ai theksoi se TikTok do të duhet të ndalohet për të paktën 1 vit në vend për të parandaluar banalitetin e shpërndarë në këtë platformë nga përdoruesit shqiptarë, dhe mungesës së moderimit nga ana e TikTok. Gjatë kësaj periudhe bllokimi 1-vjeçar do të shikohet dhe vendosja e filtrave apo reagimi i TikTok ndaj masave që mund të merren dhe nga shtete të tjera.
Geek Room është përpjekur herë pas here të komunikojë me zëdhënësit e TikTok, për të mësuar më tepër rreth situatës. Disa ditë më parë Rama u takua me Christine Grahn, drejtuesen e Marrëdhënieve me Qeveritë dhe Politikat Publike të TikTok për Evropën, për të diskutuar rreth sigurimit të garancive të nevojshme për të lejuar funksionimin e saj.
Në vazhdim të problemeve të sigurisë së TikTok në Shqiperi dhe në një situatë ku ende nuk e dimë nëse do te mbyllet apo jo, Geek Room kontaktoi TikTok për të mësuar me shume se çfarë kjo platformë po bën në Shqipëri për të adresuar problemet dhe gjetur një zgjidhje.
Në përgjigjen e dhënë, TikTok tregon se ka përmirësuar moderimin e përmbajtjeve në platformë, pasi ka punësuar më tepër se 6,000 persona në Evropë, duke përfshirë dhe folës të gjuhës shqipe. Në e mujorin e 3-të të 2024, në platformë është fshirë në mënyrë proaktive mbi 95% e përmbajtjeve që shkelin politikat e platformës, para se përdorues të tjerë t’i raportonin këto përmbajtje.
Gjithashtu vitin e kaluar u bë i mundur bashkëpunimi me Autoritetin e Mediave Audiovizive, nëpërmjet të cilës qytetarët shqiptarë mund të raportojnë të gjitha përmbajtjet e dëmshme të postuara në platformë. Ky bashkëpunim shtroi rrugën për nisjen e një projekti akoma më të madh – “Digital Safety Agenda for Western Balkans” – i cili po zhvillohet në bashkëpunim me Qendrën për të Drejtat e Fëmijëve në Shqipëri.
Ky projekt do të sigurojë akses në materiale të lehtësisht të kuptueshme në gjuhët lokale, do të lehtësojë mësimin e individualizuar dhe të diferencuar dhe do të ndihmojë në ndërtimin e programeve të trajnimit.
Article by Brenton Benja
