Lajmi i suksesit të DeepSeek shkaktoi një tërmet për botën perëndimore, duke bërë që çmimi i aksioneve të kompanive të ndryshme teknologjike të binte ndjeshëm në bursën ndërkombëtare. Edhe vetë Donald Trump vlerësoi suksesin e kësaj kompanie dhe tregoi se ka ardhur momenti që kompanitë e “Silicon Valley të zgjohen” nëse dëshirojnë të dominojë garën globale në inteligjencën artificiale.
Nvidia, një prodhues lider i çipave kompjuterikë që ka shijuar një rritje shpërthyese me zhvillimin e AI, regjistroi rënien më të madhe njëditore të vlerës në historinë e bursës amerikane, pas rënies së vlerësimit në treg me $600 miliardë. Në total, shfaqja e modelit R1 të DeepSeek me një fraksion të kostos së konkurrentëve si ChatGPT i OpenAI dhe Gemini i Google, eliminoi 1 trilion dollarë në vlerë nga indeksi kryesor i teknologjisë amerikane të hënën.
DeepSeek u krijua në vitin 2023, dhe javën e fundit prezantoi dhe modelin më të ri R1, i cili ka tërhequr vëmendjen e përdoruesve dhe investitorëve nga e gjithë bota. Madje javën e fundit ky aplikacion la pas ChatGPT të OpenAI si aplikacioni falas më i shkarkuar në App Store të Apple.
Megjithatë, ditët e fundit DeepSeek ka treguar se ka limituar përkohësisht numrin e regjistrimeve të përdoruesve të rinj për shkak të sulmeve të mëdha kibernetike që po i bëhen shërbimeve të kompanisë.
Në faqen e saj të statusit, DeepSeek tha se filloi të hetojë çështjen të hënën. Pas rreth dy orësh monitorimi, kompania tha se ishte viktimë e një “sulmi kibernetik në shkallë të gjerë”. Ndërsa DeepSeek po kufizon regjistrimet, përdoruesit ekzistues mund të identifikoheshin si zakonisht pa problem.
