Një specialist i computer vision dhe robotikës, Steven Cheng, e ka kthyer luftën kundër mushkonjave në një projekt teknologjik që duket sikur ka dalë nga një film fantastiko-shkencor. Ai ndërtoi atë që e quan “eleminuesi përfundimtar i mushkonjave”, një sistem autonom që kombinon inteligjencën artificiale, kamerat me rezolucion të lartë dhe një lazer preciz për të identifikuar dhe eliminuar insektet në kohë reale.
Gjithçka nis me një model deep learning të trajnuar mbi një dataset të krijuar nga vetë Cheng. Për të mbledhur të dhënat, ai përdori një aparat DSLR me lente zmadhimi të lartë, duke fotografuar mushkonjat nga afër për të krijuar materialin e nevojshëm për trajnim. Procesi nuk ishte aspak i lehtë, pasi Cheng pranon se përfundoi me “plot pickime mushkonjash në të gjithë trupin”, ndërsa përpiqej të siguronte imazhe cilësore për sistemin.
Fotot e mbledhura u etiketuan dhe u përdorën për të trajnuar modelin e AI, i cili më pas mësoi të dallonte mushkonjat në fluturim nga elementët e tjerë në sfond. Sipas tij, procesi i trajnimit e vuri kartën grafike nën presion të madh, por rezultati final ofroi një nivel të lartë saktësie në detektim.
Pasi zgjidhi pjesën e identifikimit, Cheng shtoi një lazer të montuar mbi një platformë industriale rrotulluese me precizion të lartë. Sapo kamera zbulon një mushkonjë dhe modeli e konfirmon objektivin, sistemi llogarit pozicionin, rregullon orientimin dhe aktivizon lazerin për ta neutralizuar menjëherë.
Për siguri, projekti përfshin edhe një kamerë të dytë me kënd të gjerë, e cila monitoron praninë e njerëzve ose materialeve të ndezshme. Nëse ekziston rreziku që lazeri të godasë diçka tjetër përveç objektivit, sistemi çaktivizohet automatikisht.
Pas testimeve, Cheng e vendosi pajisjen në shtëpinë e tij dhe pretendon se brenda një nate të vetme të gjitha mushkonjat u eliminuan. Projekti tregon se kombinimi i hardware-it komercial, GPU-ve moderne dhe teknikave të robotikës po i lejon entuziastët të ndërtojnë sisteme të avancuara autonome direkt nga shtëpia.
