Rehatia e dorezave moderne të video-lojrave nuk mund të mohohet. Pothuajse të gjithë të rinjtë dinë si të përdorin një dorezë Xbox ose PlayStation, edhe nëse nuk janë gamers. Më herët ne kemi shikuar raste se si kirurgët po përdornin kontrollorët e PlayStation për të kryer operacione nga një distancë prej mijëra kilometrash.
Shpesh herë njerëzit preferojnë përdorimin e dorezave të tilla në vend të një tastiere dhe mouse-i, dhe me sa duket këtë mendim ndajnë dhe drejtuesit në ushtritë e shteteve të ndryshme. Në Ukrainë janë raportuar disa raste se si dorezat e PlayStation janë përdorur nga ushtria, madje dhe Steam Decks, për të kontrolluar lançimin e raketave.
Dhe në ushtrinë e SHBA është vënë re një ndryshim i tillë, por për shkak të buxhetit më të zgjeruar, personeli është i pajisur me doreza të ngjashme me ato të një Xbox të prodhuara specifikisht për të kontrolluar armët e fuqishme.
Gjatë disa viteve të fundit, Departamenti i Mbrojtjes i SHBA-së ka integruar gradualisht ato që duket se janë variante të aparateve të Freedom of Movement Control Unit (FMCU) si njësitë kryesore të kontrollit për një sërë sistemesh të avancuara të armëve.
Këto sisteme përfshijnë lëshuesin e ri të Navy Marine Corps Expeditionary Ship Interdiction System (NMESIS), një sistem raketash anti-anije të bazuar në mjete taktike të përbashkëta, apo dhe sistemin e ri të Mbrojtjes Ajrore me rreze të shkurtër të Ushtrisë (M-SHORAD).
Nëse mendohemi mirë për këtë ndryshim kuptojmë se bën shumë sens që Pentagoni të hartojë sistemin e tij të dorezave të bazuar në ato të Xbox, duke patur parasysh se punonjës të ndryshëm janë rritur duke shpenzuar orë të tëra duke u përshtatur me këto doreza.
“Kompanitë e lojërave shpenzuan miliona dollarë për të zhvilluar një ndërfaqe përdoruesi optimale, intuitive dhe të lehtë për t’u mësuar, dhe më pas ata shkuan dhe shpenzuan vite duke trajnuar bazën e përdoruesve për ushtrinë amerikane se si ta përdorin atë ndërfaqe,” thotë Peter Singer, New America Foundation.
