Bazuar në punën e profesor Michael Levenson, një ekspert në psikologji në Universitetin Shtetëror të Oregonit, në internet ekziston një kuiz me 27 pika që ju ndihmon të zbuloni nëse keni disa tendenca psikopatie sekrete që nuk e dinit asnjëherë se i kishit.
Në këtë kuiz ju duhet të tregoni mënyrën se si silleni në dashuri, si ndërveproni me të tjerët apo dhe qëllimet që keni në jetë. Rezultatet, të cilat shfaqen në përqindjeje, mund t’i ndihmojnë njerëzit të kuptojnë se si renditen në një shkallë psikopatie. Studimet tregojnë se ata me rezultate të larta përqindjeje kanë 6 herë më shumë gjasa për të kryer krime të dhunshme – megjithëse ekspertët thonë se jo të gjithë psikopatët përfundojnë si kriminelë.
Kuizi së pari pyet se sa jeni dakord ose jo që suksesi bazohet në mbijetesën e më të fortit. Ai gjithashtu vlerëson nëse e gjeni veten në të njëjtat probleme, herë pas here. Pyetje të tjera mbi stilin e jetës dhe mirëqenien përfshijnë se sa të rëndësishme janë paratë për qëllimet tuaja, nëse mashtrimi është i justifikuar dhe sa ju pëlqen të manipuloni ndjenjat e njerëzve të tjerë.
Pas përfundimit të testit, pjesëmarrësit zbulojnë nëse kanë më shumë prirje psikopatike apo sociopatike.
Personalitetet sociopatike karakterizohen nga sjellja impulsive, e papërgjegjshme dhe shpesh kriminale. Nganjëherë quhet çrregullim i personalitetit antisocial. Sipas disa ekspertëve, psikopatët lindin, ndërsa sociopatët bëhen.
Kuizi gjithashtu regjistron se sa impulsiv jeni në krahasim me pjesëmarrësit e tjerë të kuizit. Megjithatë, ai vë në dukje se rezultatet duhet të përdoren vetëm si një udhëzues, dhe jo si “mjeti i vetëm për të vlerësuar tiparet psikopatike të një individi“.
