Bordi i OpenAI po shqyrton planet për të ristrukturuar kompaninë në një biznes fitimprurës, sipas një burimi që kërkoi të mbetet anonim sepse bisedimet janë në vazhdim. Kompania do të trajtojë segmentin e saj jofitimprurës si një entitet më vete pas ristrukturimit.
Struktura do të ishte më e drejtpërdrejtë për investitorët dhe do ta bënte më të lehtë për punonjësit e OpenAI realizimin e likuiditetit, shtoi burimi. Lajmet për këto ndryshime vijnë pasi Shefja e Teknologjisë e OpenAI, Mira Murati tha të mërkurën se ajo po largohet nga kompania pas gjashtë vitesh e gjysmë. Më vonë, CEO i OpenAI Sam Altman tha se shefi i kërkimit Bob McGrew dhe Barret Zoph, një zëvendëspresident në fushën e kërkimit, po largohen gjithashtu.
Murati shkroi në një memo për kompaninë: “Po largohem sepse dua të krijoj kohën dhe hapësirën për të bërë eksplorimin tim“. Ajo tha se fokusi i saj do të jetë në sigurimin e një “tranzicioni të qetë”.
“Pas shumë reflektimeve, kam marrë vendimin e vështirë për t’u larguar nga OpenAI,” shkroi ajo në një postim të publikuar në faqen e rrjeteve sociale X. “Nuk ka kurrë një kohë ideale për t’u larguar nga një vend që dikush e çmon, por ky moment ndihet i duhuri.”
Altman shkroi në një postim vonë pasdite në X se McGrew dhe Zoph po largoheshin dhe se vendimet e tyre ishin të pavarura nga njëri-tjetri. “Koha e vendimit të Mirës ishte e tillë që kishte kuptim që tani ta bënim këtë menjëherë, në mënyrë që të mund të punojmë së bashku për një tranzicion të butë te gjenerata e ardhshme e udhëheqjes,” shkroi Altman.
Bashkëthemeluesi i OpenAI Ilya Sutskever dhe ish-udhëheqësi i sigurisë Jan Leike njoftuan largimet e tyre në maj. Bashkëthemeluesi John Schulman tha muajin e kaluar se ai po largohej për t’iu bashkuar rivalit Anthropic.
