Kina e ka dënuar një vendim të BE-së për të rritur tarifat për automjetet elektrike kineze dhe e ka cilësuar si “një akt të hapur proteksionizmi“.
Komisioni Evropian, krahu ekzekutiv i BE-së, tha se nga fillimi i korrikut, do të vendosë taksa të përkohshme që do të godasin prodhuesit kinezë të automjeteve me tarifa shtesë deri në 38%, nga niveli aktual prej 10%, nëse bisedimet me Kinën nuk çojnë në një zgjidhje efektive. Tarifat shtesë të propozuara do të ndryshojnë sipas kompanisë. BYD do të përballet me një tarifë shtesë prej 17.4%; Geely, e cila zotëron Volvo të Suedisë, do të goditet me 20% të tjera, ndërsa SAIC do të përballet me një normë prej 38.1%.
Zëdhënësi i Ministrisë Kineze të Tregtisë, He Yadong, e kritikoi masën të enjten.
“Kjo jo vetëm që do të dëmtojë të drejtat dhe interesat legjitime të industrisë së automjeteve elektrike të Kinës, do të prishë bashkëpunimin reciprokisht të dobishëm midis Kinës dhe Evropës në automjetet e reja të energjisë, por gjithashtu do të shtrembërojë industrinë globale të automobilave dhe zinxhirët e furnizimit, përfshirë ato të BE-së.” tha ai në një konferencë javore për shtyp. “Është një akt flagrant proteksionizmi”, shtoi ai.
Analistët kanë paralajmëruar se ekziston një rrezik serioz i një lufte tregtare, e cila do të rriste çmimet për konsumatorët dhe do të dëmtonte eksportuesit dhe punëtorët e tyre si në Evropë ashtu edhe në Kinë – edhe pse secili shërben si një treg i madh për tjetrin.
Kina mori disa masa paralajmëruese në janar, duke nisur një hetim anti-dumping për eksportet evropiane të alkoolit duke përfshirë konjakun francez. Franca ishte një mbështetëse kryesore e hetimit të BE-së që rezultoi në prezantimin e taksave të reja ditën e mërkurë.
BE po heton gjithashtu subvencionet e dhëna për kompanitë kineze që prodhojnë panele të erës dhe diellore dhe po shqyrton dyshimet se Kina po kufizon padrejtësisht aksesin në treg për pajisjet mjekësore, një ankesë e vazhdueshme e prodhuesve evropianë.
