Apple integron fuqinë e ChatGPT në asistentin virtual Siri

Apple po bashkëpunon me OpenAI për të integruar ChatGPT në Siri, njoftoi kompania në fjalimin e saj kryesor të WWDC 2024 të hënën. ChatGPT do të jetë i disponueshëm falas në iOS 18 dhe macOS Sequoia më vonë këtë vit dhe pa krijuar një llogari, dhe Apple thotë se pyetjet e përdoruesve nuk do të regjistrohen.

Chatbot-i popullor do të integrohet gjithashtu në mjetet e shkrimit në të gjithë sistemin e Apple. Përveç kësaj, abonentët me pagesë të ChatGPT do të jenë në gjendje të lidhin llogaritë e tyre për të aksesuar në veçoritë premium të OpenAI brenda sistemeve operative të Apple. Siç shpjegojnë OpenAI dhe Apple, “Përdoruesit e Apple vihen në dijeni përpara se çdo pyetje të dërgohet në ChatGPT, së bashku me ndonjë dokument ose foto, dhe Siri më pas paraqet përgjigjen drejtpërdrejt.”

Asistenti zanor i përmirësuar tani do të integrohet më thellë në iPhone, duke u shfaqur si një dritë pulsuese në skajin e pajisjes tuaj. Do t’ju japë më shumë kontroll mbi aplikacionet tuaja, duke ju lejuar t’i kërkoni asistentit zanor të gjejë informacion brenda një emaili të caktuar ose madje të shfaqë një foto të një prej miqve tuaj.

Partneriteti i shumëpritur shfaqet ndërsa Apple përpiqet të integrojë shërbime AI që rivalizojnë ato të kompanive të tjera të mëdha të teknologjisë. “Ne jemi të gëzuar për partneritetin me Apple për të sjellë ChatGPT në një mënyrë të re drejt përdoruesve të Apple,” tha CEO i OpenAI Sam Altman. “Së bashku me Apple, ne po ua bëjmë më të lehtë njerëzve të përfitojnë nga ajo që mund të ofrojë AI.”

Krahas partneritetit të saj OpenAI, Apple njoftoi një seri të shërbimeve të veta të reja të AI nën atë që e quan Apple Intelligence.

Më tepër informacione rreth prezantimeve të reja të bëra gjatë WWDC 2024 nga Apple i gjeni këtu.