Nëse raportimet e Mark Gurman janë të vërteta, do të kemi disa surpriza të mëdha në shtator të këtij viti, ku do të prezantohen iPhone-t e rinj së bashku me versionin më të ri të sistemit operativ, iOS 18.
Gurman tregoi se ka mësuar nga persona me njohuri të brendshme se do të jetë pikërisht iOS 18 surpriza më e madhe e këtij eventi, pasi pritet të jetë përditësimi më i madh në historinë e iPhone. Së shpejti pritet të ketë më shumë detaje në lidhje me shërbimet që do ta bëjnë këtë update më të madhin në historinë e iPhone, megjithatë ne mund të flasim për 2 prej tyre që me siguri do të përfshihen në iOS 18.
Mbështetja për RCS
Në nëntor 2023, Apple njoftoi se do të mbështeste standardin e mesazheve cross-platform RCS në aplikacionin Messages në iPhone “më vonë” gjatë 2024, kështu që ka të ngjarë të jetë një shërbim i iOS 18 bazuar në atë afat kohor.
Mbështetja e teknologjisë RCS duhet të sjellë këto përmirësime në komunikimin midis iPhone dhe pajisjeve Android:
- Shpërndarja e fotove dhe videove me rezolucion më të lartë
- Shpërndarja e mesazheve me audio
- Read receipts
- Komunikimi me mesazhe përmes Wi-Fi midis iPhone dhe pajisjeve Android
- Bisedat e përmirësuara në grup
- Enkriptim i përmirësuar në krahasim me standardin SMS
Siri më inteligjent
Gurman pret që iOS 18 të përfshijë teknologjinë gjeneruese të AI “duke përmirësuar mënyrën se si Siri dhe aplikacioni Messages mund të bëjnë pyetje dhe të plotësojnë automatikisht fjali“. Ai tha se Apple ka eksploruar gjithashtu veçori gjeneruese të AI për aplikacione të tjera nëpër platformat e saj, duke përfshirë Apple Music, Pages, Keynote dhe Xcode.
The Information raportoi se Apple planifikon të inkorporojë modele të mëdha gjuhësore në Siri për t’i lejuar përdoruesit të automatizojnë detyrat komplekse, një veçori që do të përfshinte integrim më të thellë me aplikacionin Shortcuts.
