Google lajmëroi se do të ofrojë disa shërbime të reja për të gjithë përdoruesit e Pixel. Më e rëndësishmja, gjigandi i teknologjisë njoftoi se përdoruesit e Pixel 8 Pro do të jenë në gjendje të përdorin aplikacionin Thermometer të telefonit për të matur temperaturën trupore të tyre, ose të dikujt tjetër, me një skanim të ballit. Më pas ju mund ta ruani këtë rezultat në profilin tuaj Fitbit për të kuptuar më mirë shëndetin tuaj. Më parë ky shërbim mund të përdorej vetëm për të matur temperaturën e gjërave si shishja e qumështit të foshnjës ose kafeja juaj.
Një problem që e pengonte këtë shërbim të ofronte që në fillim matjen e temperaturës trupore ishte pritja e një aprovimi nga FDA. Google njoftoi gjithashtu se po lançon “Circle to Search”, një shërbim që e prezantoi javën e kaluar, për përdoruesit e Pixel 8 dhe 8 Pro.
Ai ju lejon të kërkoni për gjithçka që shfaqet në telefonin tuaj duke përdorur gjeste si rrethimi, nxjerrja në pah, shkarravitja ose prekja e asaj që dëshironi të kërkoni. Kompania thotë se ky shërbim është krijuar për ta bërë më të natyrshme angazhimin me Google Search sa herë që ju lind një pyetje, si kur jeni duke parë një video ose duke parë një imazh në rrjetet sociale.
Me Circle to Search do të keni mundësi të përdorni kërkimin nga çdo aplikacion, që do të thotë se nuk duhet të ndaloni më atë që po bëni për të kërkuar në browser ose të bëni një screenshot për t’i kujtuar vetes që të kërkoni diçka më vonë. Vlen të përmendet se funksioni do të vijë edhe në telefonat inteligjentë të rinj të Serisë Galaxy S24 më 31 janar.
Google po sjell gjithashtu teknologjinë e tij gjeneruese AI Magic Compose në pajisjet Pixel 8 dhe 8 Pro. Funksioni mund të bëjë gjëra të tilla si t’ju ndihmojë të rishkruani një mesazh të hartuar në stile të ndryshme ose t’ju bëjë të tingëlloni më profesional. Për më tepër, Google po sjell veçorinë e tij Photomoji në Pixel 3a dhe të gjithë Pixelët më të rinj që janë lançuar që atëherë. Photomoji lejon përdoruesit të transformojnë fotot e tyre të preferuara në një reaction përmes AI. Përdoruesit mund të zgjedhin çdo foto dhe të krijojnë një “photomoji” për ta përdorur në bisedat e tyre. Google thotë se të gjitha këto shërbime të reja do të fillojnë të vijnë drejt përdoruesve në ditët në vijim.
