Për sa kohë që ligji parashikon që të gjithë qytetarët e Republikës së Shqipërisë të pajisen me karta bankare (publikuar në datën 2 janar në Fletoren Zyrtare), subjektet duhet të marrin masa për përmbushjen e detyrimeve duke filluar nga data 2 prill.
Shtresat në nevojë sipas ligjit do të pajisen me karta bankare pa kosto, ndërkohë që kategoritë e tjera me të ardhura të kufizuara do të kenë kosto të përballueshme. Në këtë mënyrë ligji krijon kushtet që konsumatorët të mos mosdiskriminohen për hapjen e një llogarie me shërbime bazike.
Në shërbimet bazike përfshihen hapja e një llogarie, mbyllja e saj, tërheqja e fondeve, kryerja e pagesave apo transfertat e parave brenda vendit. Këto shërbime do të ofrohen falas për këto kategori: përfituesit e pagesës së papunësisë; familjet dhe individët që trajtohen me ndihmë ekonomike; përfituesit e pagesës së aftësisë së kufizuar dhe ndihmësit personal të tyre; individët përfitues të statusit të invalidit dhe ndihmësit personal të tyre; individët përfitues të statusit të të verbrit dhe ndihmësit personal të tyre; invalidët e punës; jetimët përfituesit e masës së financimit për fëmijën e vendosur në familje kujdestare me vendim gjykate; përfituesit e pensionit social; përfituesit e pensionit të pleqërisë; përfituesit e invaliditetit, si dhe përfituesit e pensionit të invaliditetit të përhershëm për shkak të aksidentit në punë dhe sëmundjeve profesionale; përfituesit e pensionit familjar; përfituesit e ndihmës ekonomike për arsimin e lartë.
Gjithashtu të gjithë personat që kanë aktualisht një llogari bankare normale do të kenë mundësinë të kalojnë në një llogari bazike pas përmbushjes së kushteve.
Këto lehtësira të krijuara për shtresat në nevojë dhe me të ardhura të kufizuara do ta bëjnë më të lehtë përballimin e kostove të cilat vijnë me llogaritë bankare.
