Bullizmi kibernetik është një formë e bullizmit përmes përdorimit të teknologjive dixhitale. Mund të zhvillohet në rrjetet sociale, platformat e mesazheve, platformat e lojrave dhe smartphone. Është sjellje e përsëritur, që synon të frikësojë, zemërojë ose turpërojë ata që janë në shënjestër. Shembujt përfshijnë: përhapja e gënjeshtrave ose postimi i fotove ose videove të turpshme, dërgimi i mesazheve, imazheve ose videove lënduese, abuzive ose kërcënuese apo dhe imitimi i dikujt përmes llogarive të rreme.
Për fat të keq ditën e djeshme në Shqipëri nëna e 4 fëmijëve vrau veten pas bullizmit të vazhdueshëm në platformën TikTok, të cilat ajo i kishte denoncuar dhe një vit më parë në autoritetet përkatëse. Ky lajm shkaktoi një reagim të madh në rrjetet sociale, me njerëzit që i bëjnë thirrje autoriteteve të marrin masa më të ashpra për krime të tilla kibernetike.
Mirëpo si duhet të veprojnë në këto raste personat që bien pre e bullizmit online? UNICEF jep disa këshilla duke thënë se nëse ju ndiheni të fyer nga “shakatë” e personave të ndryshëm dhe ato vazhdojnë talljen e tyre dhe pasi ju i keni kërkuar që të ndalojnë, ju nevojitet ndihmë.
Bullizmi kibernetik mund të shkaktojë efekte të rënda në shëndetin mendor, fizik dhe emocional, duke i bërë të ndihen të turpëruar, të frikësuar apo të lodhur, si dhe të humbin motivimin për të kryer aktivitetin e tyre të përditshëm.
UNICEF tregon se nëse bieni pre e këtyre fyerjeve, është më e mirë që të këshilloheni fillimisht me një person që i besoni si përshembull prindërit tuaj. Duhet të konsideroni bllokimin e këtyre personave në platformat sociale duke raportuar rastet e bullizmit. Nëse as ky hap nuk arrin dot të ndalojë bullizmin kundrejt jush, atëherë mund t’i drejtoheni dhe institucioneve përkatëse me provat e grumbulluara.
Një tjetër këshillë shumë e vlefshme është që gjithmonë të tregoheni shumë të kujdesshëm me përmbajtjet që shpërndani në internet.
