Gjatë kohëve të fundit shpesh herë kemi dëgjuar deklarata të tilla që vënë në dyshim efektivitetin e përdorimit të makinave elektrike për sa i përket reduktimit të gazeve të emëtuara në atmosferë. Në SHBA, senatori i Florida, Rick Scott tha se kishte “prova të shumta që sugjerojnë se automjetet elektrike nuk janë aq të pastra sa njerëzit mund të besojnë dhe ata meritojnë të dinë të vërtetën“.
Ai dhe kolegët e tjerë republikanë prezantuan një akt të ri i cili kishte si qëllim të kërkonte analizë më të detajuar të gazit të emëtuar nga automjetet. Një artikull i kohëve të fundit në Daily Mail raportoi se “përfitimi mjedisor i makinave elektrike mund të mos ndihet kurrë” sepse shumë automjete elektrike “nuk do të arrijnë kurrë objektivin e tyre pasi pronarët do të blejnë vazhdimisht modele më të reja, duke lënë një pjesë të makinave elektrike të përdorura të padëshiruara në garazh.”
Aktori Rowan Atkinson tha në një artikull se ndihej i “mashtruar” nga pretendimet për gazet e emëtuara dhe se realiteti ishte “shumë ndryshe“, duke cituar studimin e Volvo që sugjeronte emetimet e gazrave serrë gjatë prodhimit të një makine elektrike. janë pothuajse 70% më të larta se kur prodhohet një makinë me motor me djegie të brendshme.
Kjo do të thotë se makinat elektrike fillojnë me një disavantazh të madh emëtimi, ndonjëherë i përshkruar si një “borxh“. Megjithatë, Eoin Devane, një analist i lartë për transportin sipërfaqësor në Komitetin e Ndryshimeve Klimatike në Mbretërinë e Bashkuar tha: “Nëse shikoni të dhënat, ai ‘borxh’ paguhet brenda rreth dy viteve nga drejtimi i vazhdueshëm i automjetit.”
Pjesa dërrmuese e gazeve të emëtuara nga makinat me lëndë djegëse fosile vjen gjatë përdorimit, ku vazhdimisht nxirret dioksid karboni në atmosferë. Transport & Environment ka llogaritur se një makinë e re me benzinë do të prodhojë rreth 27 ton gaze serrë nëse drejtohet për 100,000 kilometra dhe 49 ton mbi 200,000 km.
Makinat elektrike, në të kundërt, përdorin më pak energji dhe mund të karikohen nga burime energjie të rinovueshme. Lucien Mathieu, drejtori i T&E, tha se edhe nëse zgjidhni një skenar të rastit më të keq – automjetet e prodhuara dhe të drejtuara me energji elektrike që vjen kryesisht nga djegia e qymyrit – makina elektrike do të fitojë pas rreth 70,000 km (rreth gjashtë vjet përdorim).
Rezultatet nga makinat elektrike do të përmirësohen pasi energjia nga era dhe dielli zëvendësojnë gazin dhe karburantin, duke reduktuar emetimet e karbonit nga gjenerimi i energjisë elektrike përmes burimeve të rinovueshme.
