Akseleratori i parë Europian i Startupeve themeluar në Shqipëri, Uplift Albania, hapi edicioni i tij të pestë duke ftuar themeluesit e rinj dhe startupet më emocionuese të aplikojnë deri më 4 Janar për t’u bërë pjesë e programit.
Konsideruar si përbërësi sekret pas rritjes së shpejtë të shumë sipërmarrjeve të suksesshme, programet dinamike të akseleratorëve të startupeve si Uplift Albania janë ajo shkëndija që startupet e fazave të hershme kanë nevojë në hapat e parë të rrugëtimit të tyre drejt suksesit.
12 startupe do të përzgjidhen për t’u bërë pjesë e një programi 3-mujor që më shumë sesa seminare dhe sesione mentorimi është një katalizator i cili ushqen inovacionin, promovon rritjen dhe afron sipërmarrësit e rinj me një rrjet të gjerë ekspertësh nga Shqipëria, Rajoni dhe Europa Qendrore.
Që nga kohorta e parë, në Uplift kanë kaluar 40 startupe themeluesit e të cilëve kanë përjetuar fuqinë transformuese dhe ndryshimin e mendësisë të akseleratorit të startupeve Uplift Albania që nga edicioni i parë në 2019-ën.
Fuqizuar nga EU for Innovation e implementuar nga ICTSlab në kuadër të projektin “Qëndro” mbështetur nga Qeveria Italiane UNICEF, Deloitte, SwissEP, BERZH dhe aktorë të tjerë lokalë dhe të huaj, në edicionin e pestë Uplift Albania është vënë në kërkim të kompanive teknologjike të cilat adresojnë sfida dhe fusha si dixhitalizimi, inteligjenca artificiale, Blockchain, teknologji e pastër, mobilitet, agritech, turizëm dhe e-commerce.
Duke iu bashkuar kohortës së pestë Uplift Albania, startupet inovative që do të pranohen në këtë akselerator do të fitojnë akses në 12 workshope mentorimi me ekspertë vendas dhe të huaj, të ekspozohen përballë investitorëve, të përfitojnë nga paketa Investment Readiness, të regjistrojnë markat tregtare dhe pronësisë intelektuale, mundësisë së një udhëtimi studimor në Europë, dhe çmim prej 12000 Euro.
Programi i edicionit të pestë të Uplift Albania
Një model i provuar dhe me sukses të lartë gjatë dekadës së kaluar, akseleratorët e startupeve shihen si mënyra më efektive për të mbështetur startupet në hapat e tyre të parë.
Të gjendur përballë një ekosistemi i cili dita ditës bëhet më konkurrues në Shqipëri, më shumë startupe sfidojnë njëri-tjetrin për vëmendje dhe financim.
Jo vetëm Uplift Albania ofron një ambient të strukturuar përmes të cilit startupet përfitojnë mentorim dhe qasje në resurse të çmuara, por shërben edhe si platformë promovuese për ngritjen e investimeve.
Nga ana tjetër Uplift Albania është ndër sfidat e para që startupet të reja përballen, një ambient ku ata mund të vlerësojnë modelin e tyre të biznesit dhe të testojnë produktin e tyre.
Së fundi në Uplift Albania startupet mund të ndërtojnë rrjetet e tyre duke fituar akses në konsumatorë potencialë, partnerë dhe investitorë.
Në programin e Uplift Albania startupet trajnohen në mënyrë intensive rreth modelit të biznesit, investimeve, rrjetëzimit, identitetit të markës, strategjive të shitjes dhe marketingut, aftësive prezantuese, zhvillimeve të tregut, markës tregtare dhe çështjeve ligjore dhe financave.
Startupet mund të aplikojnë deri më 4 Janar 2024 për tu bërë pjesë e akseleratorit duke klikuar në këtë lidhje: https://www.f6s.com/uplift-accelerator-2023-2024/apply, ose mund të vizitoni faqen zyrtare të akseleratorit, seksioni Pyetje të shpeshta për tu informuar më shumë rreth detajeve në https://uplift.al/faq/
Kohështrirja e programit
Pas përfundimit të afatit për aplikime në program në datën 4 Janar, më 12 Janar 2024 organizohet evenimenti përzgjedhës i startupeve më të mira quajtur Selection Bootcamp.
Por të njëjtën ditë fillon edhe programi 3-mujor i akselerimit për tu përmbyllur më 22 Mars 2024.
Më 18 Prill 2024 në Uplift Demo-Day, startupet do të prezantojnë përballë një audience të gjerë investitorësh, ekspertësh, komunitetit të teknologjisë dhe inovacionit në Shqipëri dhe një paneli jurie, ku pritet të ndahen cmime dhe grante shpërblyese për disa prej startup-eve që arrijnë të zgjojnë vëmendjen e jurisë dhe audiencës.
Si pjesë e paketës shpërblyese nga akseleratori Uplift, 4 ekipe do të përzgjidhen për t’u bërë pjesë e programit Bridge2EU për një udhëtim katër ditor në një ekosistem inovacioni dhe sipërmarrjeje në Europë, duke ju nënshtruar një programi intensiv “investment readiness”.
