Ligjet e para gjithëpërfshirëse në botë për rregullimin e inteligjencës artificiale janë miratuar në një marrëveshje historike pas një negociate maratonë 37-orëshe midis Parlamentit Evropian dhe vendeve anëtare të BE-së.
Marrëveshja u përshkrua si “historike” nga Thierry Breton, Komisioneri Evropian përgjegjës për një sërë ligjesh në Evropë që do të rregullojnë gjithashtu mediat sociale dhe motorët e kërkimit, ku përfshihen gjigantë të tillë si X, TikTok dhe Google. Breton tha se 100 persona kishin qenë në një dhomë për gati tre ditë për të nënshkruar marrëveshjen. Ai tha se “ia vlente humbja e disa orëve gjumë” për të arritur marrëveshjen “historike“.
Zyrtarët dhanë pak detaje se çfarë saktësisht do të përfshihet në ligjin përfundimtar, i cili nuk do të hyjë në fuqi deri në vitin 2025. Marrëveshja politike midis Parlamentit Evropian dhe vendeve anëtare të BE-së për ligjet e reja për të rregulluar AI ishte një betejë e vështirë, me përplasje mbi modelet e dizenjuara për qëllime të përgjithshme dhe jo specifike.
Por pati gjithashtu negociata të zgjatura mbi survjeimin e kryer nga AI, të cilat mund të përdoren nga policia, punëdhënësit ose shitësit me pakicë për të filmuar persona të tjerë në kohë reale dhe për të vlerësuar stresin emocional.
Parlamenti Evropian ndaloi përdorimin e teknologjive biometrike dhe të survejimit në kohë reale, duke përfshirë dhe gjendjen emocionale, por me tre përjashtime, sipas Breton. Kjo do të thotë se policia do të jetë në gjendje të përdorë teknologjitë vetëm në rast të një kërcënimi të papritur të një sulmi terrorist, nevojës për të kërkuar viktima dhe në ndjekjen penale të krimeve të rënda.
Themeli i marrëveshjes është një sistem me nivele të bazuara në rrezikshmëri, ku niveli më i lartë i rregullimit zbatohet për ato teknologji që paraqesin rrezikun më të lartë për shëndetin, sigurinë dhe të drejtat e njeriut. Kategoria e rrezikut më të lartë tani përcaktohet nga numri i transaksioneve kompjuterike të nevojshme për të trajnuar makinën, të njohura si “floating point operations per second” (Flops).
Tudorache tha: “Ne jemi të parët në botë që vendosim një rregullore reale për #AI, dhe për botën e ardhshme dixhitale të drejtuar nga AI, duke udhëhequr zhvillimin dhe evolucionin e kësaj teknologjie në një drejtim me në qendër njeriun.”
