Teknologjia mund të mos zëvendësojë njerëzit, por mund të bëjë të mundur që punonjësit të punojnë vetëm 3 ditë në javë – të paktën kështu mendon Bill Gates.
Miliarderi iu bashkua Trevor Noah në podcastin “What Now?” në një episod që u shfaq të martën. Kur Noah pyeti për kërcënimin e inteligjencës artificiale ndaj vendeve të punës, Gates tha se një ditë mund të vijë një kohë kur njerëzit “nuk duhet të punojnë aq shumë“.
“Nëse përfundimisht arrijmë në një shoqëri ku duhet të punosh vetëm tre ditë në javë, kjo ndoshta është tepër OK,” tha Gates. Mund të ekzistojë një botë ku “makineritë mund të përgatisin të gjitha ushqimet dhe gjërat” dhe njerëzit nuk duhet të punojnë pesë ditë pune në javë për të fituar një pagë të mjaftueshme. Ndërsa inteligjenca artificiale mund të sjellë disa ndryshime pozitive, Gates ka pranuar më parë rreziqet e AI nëse keqpërdoret.
Në korrik, ai publikoi një postim në blog me 3000 fjalë në lidhje me ndikimin e mundshëm të AI. “Unë nuk mendoj se ndikimi i AI do të jetë aq dramatik sa Revolucioni Industrial, por sigurisht që do të jetë aq i madh sa krijimi i PC. Aplikacionet e përpunimit të tekstit nuk e eliminuan punën në zyrë, por e ndryshuan atë përgjithmonë.” Gates tha në atë kohë. “Punëdhënësit dhe punonjësit duhej të përshtateshin, dhe ata e bënë.”
Dhe, Gates nuk është personi i vetëm që parashikon një javë më të shkurtër pune. CEO i JPMorgan, Jamie Dimon, tha se gjenerata e ardhshme e punëtorëve do të ketë një javë pune vetëm 3.5-ditore për shkak të AI.
“Fëmijët tuaj do të jetojnë deri në 100 vjeç dhe nuk do të kenë kancer për shkak të teknologjisë dhe ndoshta do të punojnë tre ditë e gjysmë në javë”, tha Dimon për Bloomberg në tetor. Kompanitë në SHBA dhe jashtë saj kanë testuar efektivitetin e një jave pune katër-ditore dhe disa prej tyre kanë dhënë raporte pozitive për përmirësimin e balancës punë-jetë dhe efikasitet.
