AppleInsider tregon se është zbuluar një metodë e re për riparimin e një ndër problemeve më të pranishme në ekranet OLED përmes përdorimit të lazerit.
Shpesh herë ka ndodhur në ekranet OLED që të shfaqet një vijë e drejtë sa e gjithë gjatësia e ekranit në ngjyrë jeshile apo rozë. Tashmë falë kësaj metode të re të zbuluar, ju nuk do të keni nevojë të ndërroni ekranin e pajisjes tuaj për të larguar këtë vijë të ndritshme.
Lazeri në këtë rast do të përdoret për të rregulluar problemet e vogla brenda panelit OLED që shkakton shfaqjen e dritës jeshile ose rozë. Në fakt, ekrani mund të mbahet i ndezur ndërkohë që riparimi po kryhet, duke i dhënë riparuesit feedback në kohë reale për atë që po ndodh me ekranin. Kjo mënyrë e lejon atë të dijë saktësisht se kur ekrani është rregulluar ose nëse problemi vazhdon. Procesi i riparimit përfshin përdorimin e lazerit për të rregulluar çdo gjurmë derisa vijat të zhduken. Nëse përdorimi i kësaj teknike nuk e rregullon ekranin, riparuesi mund të duhet të heqë xhamin nga pajisja dhe të përdorë përsëri lazerin.
Megjithatë duhet të theksojmë se kjo teknologji nuk do të funksionojë në ekranet e thyer OLED të iPhone apo Samsung, as nuk do të heqë gërvishtjet në xhami. Megjithatë, disa e shohin këtë si një kursim mjaft të madh për përdoruesit, pasi teknika mund të jetë në gjendje të rregullojë panelet OLED të iPhone që më parë konsideroheshin të parregullueshme dhe kjo mund t’i kursejë disa përdoruesve shpenzimet (për të mos përmendur përkeqësimin dhe kohën) për të blerë një iPhone të ri.
