Sigurisht që Twitter nuk mund të jetë shumë i lumtur pas prezantimit të aplikacionit më të ri nga Meta, Threads.
Sipas një raportimi të ri nga Semafor ku citohet një letër që i është dërguar CEOs Mark Zuckerberg, Twitter ka shkuar deri në atë pikë sa ka kërcënuar të padisë Meta me pretendimet se kjo e fundit ka punësuar në kompani persona të cilët kishin ende akses në sekretet tregtare të Twitter dhe në informacione të tjera tepër konfidenciale.
“Twitter synon të zbatojë rreptësisht të drejtat e saj të pronësisë intelektuale dhe kërkon që Meta të ndërmarrë hapa të menjëhershëm për të ndaluar përdorimin e çdo sekreti tregtar në Twitter ose informacione të tjera tepër konfidenciale.” shkruan avokati personal i Elon Musk që përfaqëson dhe Twitter, Alex Spiro, në letrën që i është drejtuar Zuckerberg. Ai pretendon se Meta ka punësuar me qëllim me dhjetëra ish-punonjës të Twitter, me qëllim që ata të punonin në zhvillimin e aplikacionit të ri Threads.
Post by @andymstoneView on Threads
Megjithatë në një postim në Threads, zëdhënësi i Meta Andy Stone tregon se “askush në ekipin e inxhinierëve të Threads nuk është një ish-punonjës i Twitter”.
Një tjetër postim që tërhoqi vëmendjen ishte ajo e vetë Elon Musk në Twitter, i cili komentoi në një postim ku flitej për padinë e Twitter duke thënë: “Konkurenca është e mirë, por mashtrimi jo.”
Competition is fine, cheating is not
— Elon Musk (@elonmusk) July 6, 2023
