Javën e kaluar pamë se si nëndetësja që dërgonte turistët në vendin e mbytjes së Titanikut shpërtheu gjatë një misioni eksplorimi, duke vrarë kështu që të 5 pasagjerët. Kjo ndodhi ka bërë që njerëz të ndryshëm të mendojnë se si është e mundur që kjo nëndetëse shpërtheu në një thellësi të tillë, ndërkohë që anija e Titanikut nuk ka shpërthyer dhe gjendet ende në formën e saj të plotë.
Ditën e enjte, prezantuesi i një radio show Jesse Kelly publikoi një tweet. “Kam një pyetje jo shumë të zgjuar. Si është e mundur që presioni i lartë shtypi nëndetësen në më pak se një sekondë, ndërkohë që Titaniku gjendent në shtratin e oqeanit relativisht i padëmtuar?”
Disa nga komentuesit nisën të talleshin me pyetjen e tij, duke thënë: “Këto janë njerëzit që dëshirojnë të debatojnë me shkencëtarët.”
Shpërthimi i nëndetëses në thellësi të mëdha ku presioni ishte shumë i lartë, ndodhi si pasojë e ndryshimeve të presioneve brenda dhe jashtë nëndetëses. Një gjë e tillë besohet të ketë ndodhur dhe në pjesën e pasme të Titanikut kur u zhyt rreth 60 metra nën sipërfaqjen e ujit.
Pjesët që nuk shpërthyen gjenden ende në trupin e anijes në fund të oqeanit pasi ajri ishte larguar nga hapësira e brendshme e anijes, dhe për pasojë presioni ishte i barabartë si në pjesën e brendshme dhe atë të jashtme të rrethuar nga uji.
