Kur vjen puna tek pajisjet e palosshme, Samsung është një ndër kompanitë më të mira në treg për sa i përket cilësisë së produkteve. Pritet që kompania të prezantojë gjatë kësaj vere gjeneratën e re të pajisjeve të palosshme, Galaxy Z Flip 5 dhe Z Fold 5, dhe pamjet e para jozyrtare kanë nisur të qarkullojnë në internet.
Në artikujt e mëparshëm kemi raportuar se si në Galaxy Z Flip 5 pritet të jetë i pranishëm një ekran i jashtëm më i madh, i cili do t’ju lejojë të kontrolloni akoma më mirë smartphone-in tuaj pa e hapur atë. Përmes raportimeve të fundit të SamMobile kemi mësuar se për të bërë që aplikacionet të duken sa më mirë në këtë ekran, Google ka bashkëpunuar me Samsung për të optimizuar aplikacionet e saj në mënyrë që t’i përshtaten sa më mirë këtij ekrani të vogël 3.4”.
Google Maps do të pajiset me një ndërfaqje të re që ju lejon të shikoni hartat pa hapur ende smartphone-in. Gjithashtu Google ka krijuar ndërfaqje të veçanta dhe për YouTube apo Messages, të cilat do t’ju lejojnë të shikoni video dhe të dërgoni mesazhe pa e hapur smartphone-in.
Dhe vetë Samsung po implementon aftësi të reja për këtë ekran si përshembull navigimi në web si dhe aksesimi i aplikacioneve native si kalendari apo ora.
Samsung Galaxy Z Flip 5 dhe Galaxy Z Fold 5 pritet të lançohen në datën 27 korrik, ku do të marrim më tepër informacione rreth këtyre pajisjeve.
