Përmirësimi i rradhës në WhatsApp duket se është inspiruar nga platformat e tjera të komunikimit me video të cilat janë më të fokusuara për punonjësit, si Microsoft Teams apo Zoom.
Bëhet fjalë pikërisht për screen sharing, një shërbim i cili bën të mundur që të gjithë pjesëmarrësit në një video-telefonatë të shikojnë pamjet e shfaqura në ekranin tuaj të telefonit. Për herë të parë prania e këtij shërbimi është raportuar nga WABetaInfo në versionin më të ri beta të WhatsApp.
Ju do të mund të aksesoni këtë shërbim të ri duke shtypur butonin e ri që do të vendoset në rreshtin e poshtëm të zakonshëm, së bashku me ikonat e ndërrimit të kamerave, ndalimit të videos apo të audios dhe mbylljes së telefonatës. Sapo të shtypni mbi këtë ikonë, do të shfaqet një tabelë e re që ju pyet nëse dëshironi të nisni regjistrimin apo shpërndarjen përmes WhatsApp.
Platforma ju paralajmëron se do të jetë në gjendje të aksesojë të gjitha këto të dhëna që shfaqen në ekran. Nëse ju jeni dakord me këtë politikë, shtypni “Start now”.
Për momentin screen share është i aksesueshëm nga persona të përzgjedhur të cilët po e testojnë këtë shërbim në smartphone-t Android, megjithatë pritet të vijë së shpejti drejt të gjithë përdoruesve në javët në vijim.
