Shpesh herë mund të na ketë ndodhur që të mos kemi më hapësirë të lirë në smartphone-in tonë në një moment kur na duhej me patjetër kjo hapësirë. Shumicën e herëve ne e kemi zgjidhur këtë problem duke çinstaluar një program të madh, dhe pse nuk dëshironim që ta bënim një gjë të tillë.
Mirëpo shërbimi i ri që do të vijë në Android do të bëjë të mundur që ju t’i mbani aplikacionet tuaja ndërkohë që liron hapësirë në memorien tuaj.
Ditën e djeshme Google prezantoi shërbimin më të ri auto-archive për Android. Përmes këtij shërbimi kompania ka si qëllim të reduktojë numrin e aplikacioneve që çinstalohen në mënyrë të panevojshme, duke liruar hapësirë në memorien e smartphone-it tuaj.
Gjigandi i teknologjisë tregon se auto-archive do të lejojë përdoruesit të lirojnë deri në 60% të memories së zënë nga një aplikacion i caktuar. Kryesisht ky shërbim do të funksionojë duke fshirë aplikacionin nga pajisja, në vend që ta çinstalojë. Në këtë mënyrë të gjitha të dhënat tuaja brenda aplikacionit do të ruhen në pajisje.
Për të aktivizuar këtë shërbim, ju duhet të ndiqni hapat e mëposhtëm.
- Provoni të instaloni një aplikacion të ri kur pajisja juaj nuk ka mjaftueshëm memorie.
- Do t’ju shfaqet një pop-up ku ju kërkohet të aktivizoni shërbimin auto-archive.
- Në qoftë se pranoni, të dhënat e aplikacioneve do të arkivohen automatikisht për të liruar hapësirën e nevojshme për instalimin e aplikacionit të ri.
Të gjithë përdoruesit që do të dëshirojnë të përdorin një aplikacion të arkivuar më parë, do të ri-shkarkojnë aplikacionin dhe do të fillojnë në të njejtën pikë ku e lanë më parë.
