Microsoft po punon sërisht për të krijuar një version modern të Windows, dhe në vitin 2024 raportohet se kompania do të prezantojë versionin e ri të Windows 12. Një gjë e tillë është tentuar dhe më parë nga Microsoft nëpërmjet Windows 10X që më pas nuk u finalizua si projekt.
Zac Bowden nga Windows Central raporton se iniciativa e re është titulluar nga punonjësit CorePC, dhe qëllimi është krijimi i një sistemi operativ nga i cili do të përfitojnë kompjuterat e formateve të ndryshme. Në këtë përpjekje projekti CorePC është i pajisur me të gjitha shërbimet e mundshme të Windows, të cilat ndahen më pas në një dizajn modular që i përshtatet llojeve të ndryshme të pajisjeve.
Njëri prej këtyre versioneve mendohet të jetë dhe një rival i ChromeOS që do të përdorë Edge, aplikacionet për Android, aplikacionet e Microsoft Office, si dhe do të jetë 60-75% më i vogël se Windows 11 SE. duhet të kujtojmë se Windows 11 SE është një version që ka kërkesa të ulëta për sistemin dhe është i fokusuar tek edukimi.
Gjithashtu Microsoft po tenton të rikrijojë suksesin që Apple pati pas krijimit të proçesorëve të saj, për të bërë një integrim më të mirë midis hardware-it dhe software-it, duke rritur performancën dhe efiçiencën e këtyre pajisjeve.
Aspekti i fundit që përmendet në raportim është dhe ai i inteligjencës artificiale. Kjo teknologji do të jetë shumë e rëndësishme në Windows 12, dhe nuk është aspak një surprizë, duke konsideruar investimet e mëdha të kompanisë në këtë drejtim si dhe integrimin në Bing apo aplikacionet e tjera të Microsoft.
