Eventi Unpacked 2023 që u organizua para pak ditësh nga Samsung foli kryesisht për serinë e re të smartphone-ve Galaxy S23 dhe laptopët Galaxy Book 3. Megjithatë kompania lajmëroi se po punon për zhvillimin e një produkti të ri interesant, një headset XR për “realitetin e zgjeruar”.
Përmes një deklarate në Washington Post, presidenti i Samsung TM Roh konfirmoi se ky produkt po përgatitet, duke lënë të kuptohet se pajisja XR nga gjigandët e teknologjisë do të mund të prezantohet në të ardhmen e afërt. Samsung po punon me Qualcomm për zhvillimin e një proçesori për këtë headset, ndërkohë që në të njejtën kohë po bashkëpunon dhe me Google për sa i përket software-it.
Zëdhënësi i Google Kaori Myaki tregoi: “Ne jemi tepër të kënaqur të punojmë me partnerët tanë në ndërtimin e gjeneratës së re të eksperiencave kompjuterike që do të zgjerojnë opsionet e shërbimeve që përdoruesit do të mund të përdorin nëpërmjet Google.”
Më tepër informacione rreth këtij produkti do të mund të marrim gjatë MWC që do të zhvillohet në javët e ardhshme ose në Google I/O 2023.
Tepër interesant është fakti se Samsung do të bashkëpunojë dhe me Microsoft dhe Meta për të krijuar shërbime rreth pajisjes XR. Është e rëndësishme që të gjitha kompanitë e përfshira të punojnë së bashku për krijimin e një ekosistemi para se të prezantohet ky produkt.
