Drejtuesi i ri i kompanisë së këmbimit të kriptomonedhave FTX, John Ray, po vlerëson mundësitë për të “rikthyer në jetë” këtë platformë. Ai tregoi për Wall Street Journal se ka ngritur një taskforcë për të eksploruar rinisjen e FTX.com me qëllim “rigjenerimin e vlerave” për të gjithë personat që humbën paratë e tyre.
Një vit më parë FTX vlente $32 miliardë, mirëpo paraqiti kërkesën për falimentimin në nëntor. Është vlerësuar se fondet me vlerë prej $8 miliardë mungonin. Sam Bankman-Fried, themeluesi dhe ish-CEO i kësaj platform është akuzuar se ka mashtruar klientët dhe investitorët për pagimin e borxheve të marra nga fondi i investimit Alameda Research.
Ray po eksploron idenë e ringjalljes së platformës në vend të likujdimit të aseteve apo shitjes së saj. Më parë ai kishte deklaruar shqetësimet e tij mbi organizimin e kësaj platfome, ku tregonte se “nuk kishte parë kurrë një dështim total mbi kontrollin e korporatës”.
Ai shtoi se rrëmuja që kishte gjetur që nga momenti që mori drejtimin e FTC ishte “e padëgjuar më parë” gjatë karrierës së tij 40 vjeçare.
Goditja e parë në tregun e kriptomonedhave erdhi gjatë muajit maj të vitit të kaluar me kolapsimin e dy monedhave Terra Luna dhe TerraUSD nën pronësinë e Terraform Labs. Nga ky kolapsim u pa një rënie prej $400 miliardë në tregun e të gjithë kriptomonedhave, ku u prek dhe Bitcoin.
