Samsung tregoi se është përgatitur për të nisur prodhimin në masë të ekraneve OLED për laptopë që kanë të integruar sensorët e prekjes direkt në panel. Kjo teknologji do të prezantohet gjatë javës së ardhshme në laptopët e rinj Galaxy Books.
Panelet përdorin teknologjinë OCTA, ose on-cell touch AMOLED, për të arritur një rezultat të tillë ku ekranet janë më të holla se në rastet kur përdoret një shtresë e veçantë për regjistrimin e prekjeve.
Kjo teknologji e përdorur më parë në smartphone-t e serisë Galaxy S dhe iPhone të Apple, pritet të vijnë në panelet me madhësi 13” dhe 16”, madje do të bëjnë të mundur mbështetjen e rezolucionit 3K si dhe refresh rate 120Hz. Samsung nuk tregoi se në cilët laptopë do të përdoret kjo teknologji, por me shumë gjasa Galaxy Book të rinj që do të prezantohen në datën 3 shkurt do të jenë produktet e para që ofrojnë teknologjinë OCTA.
Samsung planifikon gjithashtu që të prodhojë në masë këto ekrane dhe në rast se ka kërkesë nga kompani të tjera. Që nga viti 2017 kjo kompani ka furnizuar Apple me ekrane OLED për iPhone-t, dhe zhvillimet e reja për sa i përket teknologjisë së ekraneve vijnë në një kohë ku raportohet se Apple po përgatitet për të ofruar ekrane OLED në Macbook të ardhshëm. Madje shumë shpejt pritet që të vijë dhe Macbook-u i parë që do të ketë ekran touchscreen.
