Një bashkëpunim midis doktorëve dhe kompanisë 3DBio Therapeutics ka bërë të mundur që në pacienten e parë të implantohet në mënyrë të suksesshme një vesh i printuar 3D që është krijuar nga qelizat e këtij pacienti.
Ky transplant ishte pjesë e një tentative më të madhe: testimit të parë klinik të grafteve të printuara 3D nga qelizat e humanëve. Suksesi i këtij transplanti është tregues i hapit të madh të hedhur në drejtim të përdorimit të implaneteve me inde artificiale si dhe inxhinierisë së indeve. Deri më tani rezultatet janë inkurajuese dhe nëse çdo gjë ecën përgjatë kësaj rruge, në të ardhmen do të jetë e mundur që të shikojmë implantimin e tipeve të tjera të indeve.
Implantimi i strukturës indore 3D në pacienten e parë kishte si qëllim trajtimin e sëmundjes së quajtur “mikrotia”, ku kemi një zhvillim penguar në një ose të dy veshët. Çdo vit në SHBA lindin rreth 1,500 fëmijë me këtë defekt.
Në zhvillimin e strukturës indore të printuar 3D përfshihet marrja e materialeve nga indi ekzistues i pacientit, nga ku formohen qelizat e kërcit. Më pas këto qeliza shumohen në kultura dhe përdoren si material për printimin e formës së re të veshit, para se të implantohen tek pacientët.
Këto “veshë të printuar” rigjenerojnë kërcin me kalimin e kohës gjatë jetës së pacientit dhe kanë shumë pak shance të refuzohen nga trupi pasi janë krijuar nga të njejtat qeliza.
Në të ardhmen kompania shpreson të zbulojë se si të krijojë pjesë të tjera të trupit duke përdorur këtë teknologji, duke përfshirë këtu disqet spinale, hundën, menisqet e shumë pjesë të tjera.
