Duket se shumë shpejta bota do të arrijë në një krizë globale për sa i përket ruajtjes së të dhënave. Pritet që numri i informacioneve të rritet me 300% deri në vitin 2025, dhe për këtë arsye mund të mos ketë hapësirë të mjaftueshme në “cloud” për të ruajtur këtë sasi mjaft të madhe.
Paralajmërimi vjen nga shkencëtarët në Aston University, të cilët po mundohen të hartojnë një plan tjetër përveç krijimit të më tepër serverave (të cilët shpenzojnë rreth 1.5% të energjisë elektrike në mbarë botën përgjatë një viti).
Për t’u përballur me këtë problem, ky ekip ka vendosur të zhvillojë një teknologji të re duke përdorur polimerë të avancuar kimikë. “Rritja e efiçiencës së teknologjive ekzistuese do të reduktojë në mënyrë të konsiderueshme nevojën për krijimin e qendrave të reja të kushtueshme për ruajtjen e të dhënave. Tre vitet e ardhshme do të jenë tepër të rëndësishme në këtë drejtim.” tha Amit Kumar Sarkar.
Drejtuesi i këtij projekti, Dr Matt Derry tha në një deklaratë për shtyp se ndërtimi i qendrave të reja për ruajtjen e të dhënave nuk është zgjidhja e duhur e këtij problemi. “Me kalimin e kohës ne po përballemi me një rrezik për zhvillimin e krizës së ruajtjes së informacionit, prandaj janë të nevojshme avancime të reja teknologjike për t’iu përgjigjur nevojave të botës moderne.” shtoi ai.
Në 2025 parashikohet që kapaciteti dixhital i qendrave të të dhënave të jetë 175ZB. (1 zettabyte=1 trilion gigabyte).
