CES është zakonisht një event gjatë të cilit prezantohen inovacionet më të reja teknologjike, dhe me shumë mundësi kjo traditë do të vazhdojë në vitin 2023, pasi një kompani ka treguar se do të prezantojë televizorin e parë OLED wireless në botë gjatë këtij eventi.
Ky televizor OLED supozohet që të jetë lehtësisht i transportueshëm, pasi peshon vetëm 9 kg, dhe fuqizohet nga një bateri e veçantë që mund të sigurojë energji për përdorimin e TV deri në 30 ditë (me përdorim ditor prej 6 orësh) para se të ketë nevojë për t’u rikarikuar.
Vetë televizori do të ketë një madhësi prej 55 inç dhe kompania tregon se mund të sigurohet lehtësisht në çfarëdo sipërfaqje pa pasur nevojë për montim, duke përdorur teknologjinë e veçantë active-loop vacuum.
Fakti akoma më interesant është se televizori do të mund të kontrollohet nëpërmjet lëvizjeve të duarve së bashku me komandat nga prekja apo ato zanore. Nëse ju zotëroni më tepër se 1 TV të tillë, ju mund t’i kombinoni ato për të krijuar një ekran akoma dhe më të madh.
TV do të prodhohet nga një kompani e quajtur Displace. Kompania mendon se ky produkt do të jetë gati për të dalë në treg në fund të vitit 2023, ndërkohë që produkti do të prezantohet në datën 4 janar me fillimin e CES 2023.
