Me qindra punonjës të fabrikës kryesore të Apple në Kinë ku prodhohen iPhone janë përplasur me punonjësit e sigurisë, pasi tensionet u rritën përgjatë muajit të fundit për shkak të masave kufizuese të vendosura për të luftuar përhapjen e koronavirusit.
Punonjësit në Foxconn Technology Group u larguan nga dhomat e tyre të pushimit në orët e para të ditës së sotme dhe nisën të përlesheshin me punonjësit e sigurisë, të cilët ishin në numër shumë të vogël. Situata u agravua aq shumë saqë disa persona rrethuan një makinë policie dhe nisën ta sulmonin atë me shkopinj apo gurë.
Protesta nisi gjatë natës për shkak të mospagimit të rrogave të punonjësve dhe shpërndarjes së COVID-19. Disa punonjës u dëmtuan nga përleshjet, dhe më pas u pa ndërhyrja e policisë për të qetësuar situatën.
“Foxconn asnjëherë nuk i trajton njerëzit si njerëz,” tha një nga punonjësit.
Në një video mund të shikohet se si punonjësit e irrituar rrethojnë një menaxher në dhomën e konferencave për të shprehur shqetësimet e tyre ndaj situatës. Ky rast mjaft i rrallë dhune në fabrikën në qendër të qytetit Zhengzhou reflekton rritjen e tensioneve që në momentin e vendosjes së kufizimeve në tetor. Më tepër se 200,000 punonjës në “Qytetin e iPhone” janë futur në izolim dhe janë detyruar të jetojnë me ushqim të limituar dhe mungesë medikamentesh.
