Disa nga inxhinierët në Volkswagen duket se kanë pasur shumë kohë të lirë gjatë muajve të fundit, pasi kanë dizenjuar një karrige zyre të motorizuar dhe shërbime mjaft të veçanta.
Kjo karrige mban emrin e thjeshtë “the chair” dhe ka një shpejtësi maksimale lëvizje prej 20km/h falë motorit të vetëm elektrik që lëviz rrotat e mëdha 4 inç alumini. Në një karikim të plotë kjo karrige mund të udhëtojë deri në 12km nga dhoma deri në banjo.
Përderisa lëvizja është në shpejtësi të konsiderueshme, i pranishëm është gjithashtu dhe rripi i sigurimit së bashku me plot shërbime të tjera. Dritat LED do të ndriçojnë korridoret ku do të lëvizni. Shpesh herë punonjësit e tjerë mund të bëhen pengesë në rrugën tuaj, por ju mund të përdorni borinë për t’i bërë ato që të hapin rrugën. Nëse ato nuk binden, mund të ngrini volumin e speaker-ave në maksimum për t’i bezdisur.
Sistemi infotainment i përfshirë në karrige do t’ju mbajë të informuar mbi gjendjen e karriges. Këtu do të përfshihen dhe sensorët dhe kamera 360 gradë, në rast se kolegët dëshirojnë t’ju trembin.
Sigurisht që kjo karrige nuk mund të gjendet në shitje në të gjitha pikat e autroizuara, pasi është një projekt i veçantë që do të përdoret për të reklamuar linjën e fugonëve të VW.
