Nëse ju luani në një lojë për një kohë të caktuar me shumë mundësi do të përballeni me disa lojtarë “toksikë” të cilët thonë fjalë ofenduese nëpërmjet komunikimit me zë ose text chat. Activision ka vendosur të luftojë kundër këtyre personave përmes shërbimeve të reja të moderimit në Call of Duty: Modern Warfare II dhe Call of Duty Warzone 2.0.
Kur ekipi i moderimit të konfirmojë se një lojtar ka shkruajtur apo ka folur fjalë ofenduese në chat, ata kanë tashmë mundësinë për të bërë “mute” këtë person në të gjitha kanalet e komunikimit. Pra, dhe pse lojtarët që ofendojnë mund të mos marrin një dënim të plotë, ata do të heshten nga të gjitha format e komunikimit në lojë.
Activision do të mbështetet në raportimet e bëra nga lojtarët e tjerë gjatë lojës. Riot Games nga ana tjetër ka vendosur të monitorojë aktivisht chat-in e Valorant për të eleminuar “toksicitetin”.
Para se lojtarët të nisin të luajnë Modern Warfare II apo Warzone 2.0, ata do të lexojnë dhe pranojnë një kod sjellje të caktuar, ku përfshihet dhe zotimi se nuk do të përfshihen në bullizimin apo ngacmimin e lojtarëve të tjerë.
Përdorimi i këtyre shërbimeve të moderimit për të parandaluar përhapjen e mesazheve ofenduese do të ofrojë një eksperiencë më pozitive për të gjithë përdoruesit e lojës.
