Prej disa kohësh ne kemi vënë re se proçesorët e krijuar nga vetë Samsung nuk kanë qenë në të njejtin nivel me ato të Qualcomm. Këtë vit vetëm versionet evropiane të serisë flagship S u pajisën me proçesorin Exynos 2200, ndërkohë që në të gjitha tregjet e tjera (rreth 75% të pajisjeve) u përdor Snapdragon 8 Gen 1.
CEO i Qualcomm Cristian Amon sugjeroi se kjo përqindje mund të ngrihet akoma dhe më tepër gjatë vitit të ardhshëm, duke rritur besueshmërinë e raportimeve të mëparshme se seria Galaxy S23 do të përdorë vetëm proçesorët Snapdragon 8 Gen 2. “Para marrëveshjes ne ishin në 75% në Galaxy S22. Ne mendojmë se situata do të jetë shumë herë më e mirë në Galaxy S23 dhe më tej.” tha Amon.
Partneriteti midis Qualcomm dhe Samsung nuk do të ndalet vetëm në smartphone-t flagship, por do të përfshihen dhe Galaxy Books, kompjutera Windows, tabletët Galaxy apo pajisje të ardhshme VR. Këto dy kompani kanë zgjatur marrëveshjen e liçensimit të patentës deri në 2030, ku përfshihen rrjeti 3G, 4G, 5G dhe ato 6G.
A do të jetë ky fundi i divizionit Exynos? Samsung thotë që jo, por tregon se ky divizion ka nevojë për një riorganizim, pra proçesorët Exynos do të shfrytëzohen më tepër në aksesorët si smartwatch. Gjithashtu proçesorët mid-range dhe ato entry level të Exynos duket se do të vazhdojnë të qarkullojnë në treg.
